Sancion Mericano ta haci excepcion pa Corsou

WILLEMSTAD - “Merka a implementá sanshonnan nobo kontra e empresa estatal di oro di Venezuela. Ademas, Merka a anunsiá ku na e luna di aprel nan no lo prolongá e suspenshon di sanshonnan riba industria di petroli i gas si pa e tempu ei no tin mehorashon den demokrasia Venezolano. E impakto di e desishonnan aki mester sali na kla den próksimo lunanan.” Asina Tessa van Staden, bosero di minister di Relashonnan Eksterior di Hulanda ta duna di konosé na Extra. Mas aleu e ta bisa: “Merka ta deskribí hopi spesífiko ta di kua sanshonnan ta trata. E eksepshonnan individual pa e parti Karibense di Reino ta keda na vigor.”

Manera ta konosí Kòrsou i Venezuela aña pasá a yega na un akuerdo den un disputa di hopi aña entre RdK i PdVSA. E akuerdo tabata posibel pa motibu di e eksepshon spesífiko den sanshonnan ku Merka a implementá pa sektor di petroli i zeta di Venezuela. Minister-presidente Gilmar ‘Pik’ Pisas resientemente a bisa ku re-instalashon di sanshon di Merka lo no afektá e akuerdo entre RdK i PdVSA.

Splikashon for di bosero di minister di Relashonnan Eksterior na Hulanda ta sigui e mesun liña.

Manera ta konosí gobièrnu di Merka siman pasá a disidí di reaktiva e sanshonnan ku el a imponé kontra Venezuela. Gobièrnu merikano a ekspresá krítiko fuerte kontra e último akshonnan di presidente Nicolas Maduro kontra kontrinkantenan polítiko den e pais. Entre e akshonnan di último tempu tin detenshon di miembronan di oposishon,  eksklushon di kandidatonan pa elekshon presidensial e aña aki, i tur esakinan ta kontra palabrashonnan ku e propio gobièrnu di Maduro a firma na òktober di aña pasá, esei di akuerdo ku e Ministerio di Asuntunan Eksterior na Merka.

Den luna di òktober 2023 Merka a disidí di aliviá e sanshonnan kontra Venezuela komo un sosten pa e akuerdo. A bini un suavisashon pa e sektor petrolero i di gas pa un periodo di seis luna, te ku medio aprel. Pero awor e ministerio a duna di konosé ku e suavisashon ei lo no ser prolongá si lo no tin mehorashon den demokrasia Venezolano.

Di parti di gobièrnu Venezolano nan ta denominá e medidanan Merikano aki komo “ekstorshon”. NOTA:E texto ta scirbi den Papiamento fonetico di Corsou.