Un visionario y pionero: Harold Malmberg a fayece

Un visionario y pionero: Harold Malmberg a fayece

Posted on 02/6/2024 10:27 am AST | Updated on 02/6/2024 10:29 am AST

ORANJESTAD - Den fin di siman a drenta e noticia cu un visionario y pionero di turismo Harold Malmberg a fayece. Un persona cu a traha hopi pa turismo, pero humilde te na su ultimo dia di bida.

Por corda ainda cu riba 26 di september di aña pasa, den seno familiar a haci entrega na dje e reconocimento di Officier in der Orde van Oranje-Nassau. Na e ocasion ey tabata presente Gobernador Alfonso Boekhoudt y Minister Presidente Evelyna C. Wever-Croes.Y tambe algun miembro di famia, incluyendo su dos yiunan.

A otorga Harold Désire Malmberg e reconocemento di Officier in de Orde van Oranje-Nassau,  pa su gran contribucion na e sector di turismo di Aruba.

Desde aña 2016 a menciona su nomber riba e Ike Cohen Monument na Plaza Turismo como aprecio pa su contribucion.

Harold Malmberg su recorido na mundo y Aruba ta un testament di e poder di dedicacion pa trece transformacion. Esaki compaña cu perseverancia y un espirito visionario.

Su compromiso indiscutibel pa cu e isla di Aruba a laga su marca atras, dunando forma na loke e industria di turismo ta awendia.

UN VISIONARIO HUMILDE DESDE INICIO

Naci di mayornan di inmigrante, Harold Malmberg a yega Aruba ora cu e tabata apenas un baby y a crece den un bario modesto di Pos Chikito y Dakota. Apesar di a pasa den un situacion financiero duro pa cual e no por a finalisa su scol secundario, e tabata e ehempel di un persona cu educa su mes henter su bida, lesando hopi, a sigui cursonan y siña di otronan.

Como un mucha homber hoben, tragedia a bati na su porta ora cu el a perde su mama stima. E periodo aki yen di reto no a strob'e. El a cuminsa su carera den aviacion cu KLM, unda cu su dedicacion, determinacion y su pensamento innovativo a dun'e admiracion di tanto su superiornan como e coleganan.

Sinembargo, durante e tempo ey, el a confronta algun obstaculo cu a stroba su aspiracionnan.

E caminda di bida a hiba Harold den e departamento di biahe di Maduro & Sons, unda cu un biaha mas, el a sobresali den tur aspecto laboral, Sinembargo, pa haya un posicion di lider a keda un soño, ya cu tur e puestonan aki tabata reserva pa Hulandesnan.

SPIRITO PIONERO Y SACRIFICIO

Pero hopi lihe oportunidad a bati na su porta ora cu el a haya e chens pa cumpra De Palm Tours. Sin e reconocimento den mundo comercial, institucionnan financiero a nenga su peticion pa un capital pa e por realisa e compra.

Nada di esaki a kibr'e, y el a acerca amigonan fiel y algun di su clientenan di hopi tempo, kendenan a beneficia di su bon servicio den transcurso di añanan. Nan a confia den dje y a acepta su proposicion, y cu ayudo di su casa cu semper a apoy'e, el a bende su cas y auto, a saca tur loke cu el a spaar pa cuminsa un biahe yena di aventura.  

Por corda e mensahe aki cu a sali publica ora cu el a haya e reconocemento aña pasa: E nominacion di Harold Malmberg no ta solamente un reconocimento pa su logronan como un empresario exitoso pero ta un tributo pa e caracter di e persona aki mes.

E ta personifica integridad, trabou duro, sacrificio, resiliencia, creatividad y un spirito determinante durante henter su bida. Cu cada reto, e tabata nenga di acepta un "no" of bisa "imposibel", hayando solucionnan original pa cada obstaculo. EL a brasa e concepto di "inverti loke cu bo a haya", reinverti su entradanan cu cada oportunidad cu ta nifica crecemento di su empresa.

UN ALMA BONDADOSO TRAS DI CORTINA

Tras di cortina y den formanan masha discreto sin busca reconocimento, Harold Malmberg a saca un man pa esnan den necesidad. El a facilita tratamento medico pa personanan cu tabatin mester di cuido pafo di Aruba, a duna conseho valioso na hopi cu a enfrenta reto y dilemanan, y constantemente a mustra su bon curason, un alma generoso y actonan di compasion, entre e y su casa stima.

E tabata tambe e visionario fundador tras di e Fondo di Pension di Sector di Turismo, considerando e necesidad pa garantisa un entrada pa trahadonan di sector turistico pa un Fondo di Pension, hopi decada prome cu el a bira algo rekeri pa ley. E tabata kere y apoya e privatisacion di ATA.  

Harold D. Malmberg tabata merece e honor aki, no solamente pa su exito como comerciante / empresario pero tambe e caracter excepcional cu el a demostra durante henter su bida. E ta un ehempel pa e generacion hoben, ofreciendo un bista di balor- y virtudnan cu ta conduci no solamente na exito personal pero tambe pa un persona unda cu dedicacion y sacrificio ta trece bendicion pa hopi otro.

UN LEGADO CU TA IMPACTA Y INSPIRA

E legado di Harold Malmberg ta bay mas leu cu e sector di su imperio comercial. Su pasion pa turismo di Aruba a enrikece e experiencia di e bishitante na e isla, poniendo hopi sonrisa riba cara di turistanan di rond mundo. Su spirito pionero a contribui den forma signifcante pa e sector cu awendia ta representa mas cu 90% di Aruba su GDP – un sector cu un tempo tabata scur y awendia ta e pilar economico di e isla aki.

Mientras Aruba ta sigui prospera como un destino turistico di primera clase, e vision, dedicacion y compromiso di semper di Malmberg ta sirbi como un fuente eterno di inspiracion. E historia di su bida ta ehempel di e balornan fundamental di integridad, trabou duro, sacrificio, perseverancia, creatividad y un spirito absolutamente indomabel.

UN LUZ DI SPERANSA PA E FUTURO GENERACIONNAN

E reconocimento di gobierno aki na Harold D Malmberg mester sirbi pa futuro generacionnan mas hoben haya e oportunidad di siña di e balor y virtudnan cu transcurso di tempo. E cualidadnan aki no solamente ta conduci na exito y importancia personal, sino cu e ta representa un forma no comun: e exito y e importancia generacional, ya cu su yiunan Ricky y Lisette, awo ta sigui cu e esfuersonan comercial y e contribucionnan social di e famia, liderando e grupo di companianan De Palm y otro institucionnan caritativo.

Esaki tabata un bunita mensahe unda cu ta splica e persona humilde cu Harold Malmberg y cu hasta esnan cu no conoce personalmente ta yega na e impresion aki.

Na famia di Harold Malmberg ta bay palabranan di condolencia.

  • Powered by SETAR