Un visionario y pionero: Harold Malmberg a fayece

Un visionario y pionero: Harold Malmberg a fayece

Posted on 02/6/2024 10:27 am AST | Updated on 02/6/2024 10:29 am AST

ORANJESTAD - Den fin di siman a drenta e noticia cu un visionario y pionero di turismo Harold Malmberg a fayece. Un persona cu a traha hopi pa turismo, pero humilde te na su ultimo dia di bida.

Por corda ainda cu riba 26 di september di aña pasa, den seno familiar a haci entrega na dje e reconocimento di Officier in der Orde van Oranje-Nassau. Na e ocasion ey tabata presente Gobernador Alfonso Boekhoudt y Minister Presidente Evelyna C. Wever-Croes.Y tambe algun miembro di famia, incluyendo su dos yiunan.

A otorga Harold Désire Malmberg e reconocemento di Officier in de Orde van Oranje-Nassau,  pa su gran contribucion na e sector di turismo di Aruba.

Desde aña 2016 a menciona su nomber riba e Ike Cohen Monument na Plaza Turismo como aprecio pa su contribucion.

Harold Malmberg su recorido na mundo y Aruba ta un testament di e poder di dedicacion pa trece transformacion. Esaki compaña cu perseverancia y un espirito visionario.

Su compromiso indiscutibel pa cu e isla di Aruba a laga su marca atras, dunando forma na loke e industria di turismo ta awendia.

UN VISIONARIO HUMILDE DESDE INICIO

Naci di mayornan di inmigrante, Harold Malmberg a yega Aruba ora cu e tabata apenas un baby y a crece den un bario modesto di Pos Chikito y Dakota. Apesar di a pasa den un situacion financiero duro pa cual e no por a finalisa su scol secundario, e tabata e ehempel di un persona cu educa su mes henter su bida, lesando hopi, a sigui cursonan y siña di otronan.

Como un mucha homber hoben, tragedia a bati na su porta ora cu el a perde su mama stima. E periodo aki yen di reto no a strob'e. El a cuminsa su carera den aviacion cu KLM, unda cu su dedicacion, determinacion y su pensamento innovativo a dun'e admiracion di tanto su superiornan como e coleganan.

Sinembargo, durante e tempo ey, el a confronta algun obstaculo cu a stroba su aspiracionnan.

E caminda di bida a hiba Harold den e departamento di biahe di Maduro & Sons, unda cu un biaha mas, el a sobresali den tur aspecto laboral, Sinembargo, pa haya un posicion di lider a keda un soño, ya cu tur e puestonan aki tabata reserva pa Hulandesnan.

SPIRITO PIONERO Y SACRIFICIO

Pero hopi lihe oportunidad a bati na su porta ora cu el a haya e chens pa cumpra De Palm Tours. Sin e reconocimento den mundo comercial, institucionnan financiero a nenga su peticion pa un capital pa e por realisa e compra.

Nada di esaki a kibr'e, y el a acerca amigonan fiel y algun di su clientenan di hopi tempo, kendenan a beneficia di su bon servicio den transcurso di añanan. Nan a confia den dje y a acepta su proposicion, y cu ayudo di su casa cu semper a apoy'e, el a bende su cas y auto, a saca tur loke cu el a spaar pa cuminsa un biahe yena di aventura.  

Por corda e mensahe aki cu a sali publica ora cu el a haya e reconocemento aña pasa: E nominacion di Harold Malmberg no ta solamente un reconocimento pa su logronan como un empresario exitoso pero ta un tributo pa e caracter di e persona aki mes.

E ta personifica integridad, trabou duro, sacrificio, resiliencia, creatividad y un spirito determinante durante henter su bida. Cu cada reto, e tabata nenga di acepta un "no" of bisa "imposibel", hayando solucionnan original pa cada obstaculo. EL a brasa e concepto di "inverti loke cu bo a haya", reinverti su entradanan cu cada oportunidad cu ta nifica crecemento di su empresa.

UN ALMA BONDADOSO TRAS DI CORTINA

Tras di cortina y den formanan masha discreto sin busca reconocimento, Harold Malmberg a saca un man pa esnan den necesidad. El a facilita tratamento medico pa personanan cu tabatin mester di cuido pafo di Aruba, a duna conseho valioso na hopi cu a enfrenta reto y dilemanan, y constantemente a mustra su bon curason, un alma generoso y actonan di compasion, entre e y su casa stima.

E tabata tambe e visionario fundador tras di e Fondo di Pension di Sector di Turismo, considerando e necesidad pa garantisa un entrada pa trahadonan di sector turistico pa un Fondo di Pension, hopi decada prome cu el a bira algo rekeri pa ley. E tabata kere y apoya e privatisacion di ATA.  

Harold D. Malmberg tabata merece e honor aki, no solamente pa su exito como comerciante / empresario pero tambe e caracter excepcional cu el a demostra durante henter su bida. E ta un ehempel pa e generacion hoben, ofreciendo un bista di balor- y virtudnan cu ta conduci no solamente na exito personal pero tambe pa un persona unda cu dedicacion y sacrificio ta trece bendicion pa hopi otro.

UN LEGADO CU TA IMPACTA Y INSPIRA

E legado di Harold Malmberg ta bay mas leu cu e sector di su imperio comercial. Su pasion pa turismo di Aruba a enrikece e experiencia di e bishitante na e isla, poniendo hopi sonrisa riba cara di turistanan di rond mundo. Su spirito pionero a contribui den forma signifcante pa e sector cu awendia ta representa mas cu 90% di Aruba su GDP – un sector cu un tempo tabata scur y awendia ta e pilar economico di e isla aki.

Mientras Aruba ta sigui prospera como un destino turistico di primera clase, e vision, dedicacion y compromiso di semper di Malmberg ta sirbi como un fuente eterno di inspiracion. E historia di su bida ta ehempel di e balornan fundamental di integridad, trabou duro, sacrificio, perseverancia, creatividad y un spirito absolutamente indomabel.

UN LUZ DI SPERANSA PA E FUTURO GENERACIONNAN

E reconocimento di gobierno aki na Harold D Malmberg mester sirbi pa futuro generacionnan mas hoben haya e oportunidad di siña di e balor y virtudnan cu transcurso di tempo. E cualidadnan aki no solamente ta conduci na exito y importancia personal, sino cu e ta representa un forma no comun: e exito y e importancia generacional, ya cu su yiunan Ricky y Lisette, awo ta sigui cu e esfuersonan comercial y e contribucionnan social di e famia, liderando e grupo di companianan De Palm y otro institucionnan caritativo.

Esaki tabata un bunita mensahe unda cu ta splica e persona humilde cu Harold Malmberg y cu hasta esnan cu no conoce personalmente ta yega na e impresion aki.

Na famia di Harold Malmberg ta bay palabranan di condolencia.

  • Embassy Suites a logra precario pa pone palapa, banda di e beach cu nan a solicita

    Embassy Suites a logra precario pa pone palapa, banda di e beach cu nan a solicita

    ORANJESTAD – Despues di basta problema, Embassy Suites Aruba Resort a logra haya su precario pa pone palapa riba beach. Esaki ta un otro 'palabra' pa e permiso pa pone palapa y stul pa nan turistanan por usa e beach respectivo. Segun abogado cu ta representa e hotel, Gwendelyn Croes, a bisa Noticiacla, “E ta (e) mesun precario cu tur otro hotel ta haya”,. Segun Croes, pa pone palapa y beach chairs e mester comparti cu e precario cu a wordo duna eynan den pasado na e Watersport bedrijf cu tin su tent eyriba. 

  • HBO ta estrena serie documental di Aruba cuminsando na April

    HBO ta estrena serie documental di Aruba cuminsando na April

    ORANJESTAD - “Blue Lizard Effect” t'e serie documentario nobo di Aruba cu lo ta disponibel riba HBO MAX entrante dia 17 di april 2024 pa e mercado di Latino America, Europa y Merca. A realisa e serie Blue Lizard hunto cu Aruba Tourism Authority (A.T.A.) y Pacifista Film. Cu e serie aki Aruba ta posiciona como un di e islanan di Caribe mas innovativo den desaroyo di contenido y comunicacion.

  • DOW ta reclama: “Esaki no ta manera pa comporta na nos beachnan”

    DOW ta reclama: “Esaki no ta manera pa comporta na nos beachnan”

    ORANJESTAD – DOW diahuebs no tabata nada contento cu e situacion cu nan a encontra durante un control di e beachnan recientemente. “Esaki no ta manera pa comporta na nos beachnan” tabata e mensahe di DOW diahuebs riba nan pagina di Facebook, acompaña pa varios potret di e situacion. A mustra cu hopi hende, localy turista lo a susha e beach considerablemente na varios parti unda cu DOW a traha un structura miho di intrastructura. “ Ta pidi nos localnan y sigur nos turistanan pa por fabor tene nos beachnan limpi” DOW a sigui bisa. . 

  • Havenmeester Bonaire: Tin manchanan di zeta na caminda pa Aruba y Corsou

    Havenmeester Bonaire: Tin manchanan di zeta na caminda pa Aruba y Corsou

    ORANJESTAD – Tin mancha di zeta (petrolio) na caminda pa Aruba y Corsou. Asina e havenmeester di Bonaire Gunther Flanegin a bisa diaranson merdia durante un conferencia di prensa na Bonaire riba e situacion di e manchanan di zeta cu a yega Bonaire e siman aki, procedente di e derame di zeta di un boto na Trinidad y Tobago. E isla a haye ta limpia varios boca cu a keda afecta, pero a mira cu fuera di esey, no tin menasa mas. Mes momento, riba pregunta di noticiacla riba e informe di Bonaire, e director di CMO, Rino Hermans a informa e portal aki cu ta spera esaki pa mayan, per mes momento ta bisa tambe cu mañan nan ta premira algo di e manchanan. “ Pero e stroom ta na nos banda pa want’e for di costa (di Aruba)” Hermans a sigura e portal aki diaranson merdia. 

  • CMO: Tin ekipo di 60 hende cla pa atende cu derame petrolero si e yega Aruba

    CMO: Tin ekipo di 60 hende cla pa atende cu derame petrolero si e yega Aruba

    ORANJESTAD – Gobierno di Aruba ta planea pa activa un ekipo di 60 hende pa atende cu e situacion di derame di petrolio si esaki yega costa di nos isla. Asina e director di e Crisis Management Office (CMO) Rino Hermans a declara na prensa internacional e siman aki. Manera ta conoci, e derame di petrolio cu a sosode na Trinidad y Tobago, a yega costa di Bonaire e siman aki pa cual Aruba a anuncia cu nos ta den codigo oraño (for di codigo geel). E ekipo lo trata hende di prome auxilio (first responders) y di limpiesa. 

  • Conocido comerciante y personahe deportivo Eddy Daou a bay sosega

    Conocido comerciante y personahe deportivo Eddy Daou a bay sosega

    ORANJESTAD – Awe mainta e noticia a drenta cu e conocido comerciante y personahe den deporte na Aruba, Fouad ‘Eddy’ Daou a bay sosega. Ademas famianan tambe a confirma e noticia lamentable na e portal aki, esta noticiacla.com. Daou tabata basta debil pa hopi tempo caba pa motibo di su salud. Recientemente e tabata ainda na e despedida di su ruman Sanin su entiero. Eddy tabata tambe un di e propietario di e negoshi Dowco. Eddie tabata un yiu di Corsou, cu hunto cu su otro rumanan a bin biba na Aruba den añanan  80 y a establece nan mes comercialmente hopi fuerte. Noticiacla ta manda palabra di condolencia na famianan di Eddy Daou. Cu Eddie sosega na paz. 

  • Zulo
  • Varadero
  • Powered by SETAR