Corte: Ginecologo Narain por traha na hospital te cu su 70 aña

ORANJESTAD – Conocido ginecologo dr Harold Narain mester wordo permiti pa drenta hospital pa haci su trabou, sin problema. Cada dia cu strobe di drenta y haci su trabou, hospital Horacio Oduber, ta wordo multa 5.000 florin te na un maximo di 500.000 florin. Esaki ta e sentencia cu huez a dicta awe mainta. Ademas, huez ta mustra cu Narain por traha por lo menos te ora cu e cumpli 70 aña. Pues 5 aña mas cu tabata stipula segun contract. Y huez a motiva su decision tambe den su sentencia.

FAYO HOSPITAL

Segun huez, Narain a traha tur e tempo, pensando cu e lo por haci esaki te cu su 70 aña. Esaki basa riba un acuerdo firma 19 aña pasa cu hospital. E acuerdo tabata pa traha te 65 aña, pero Narain mesora a adapta esaki den un carta y bisa cu e kier hacie te 70 aña. Hospital sinembargo nunca no a contesta esaki, sino te na december 2014 ora cu e la notifica Narain di su decision pa no permitie extension di contracto. Huez no ta considera hospital serio den e asunto, mirando cu diripiente despues di 19 aña, ta contesta e obhecion di Narain (su peticion pa traha te 70 aña). Como tal huez ta considera cu hospital a faya den esaki.

65 AÑA

Ademas, hospital no por a demostra cu hechos, pakico (los di e edad), e docter no por sigui traha. Di otro banda, hues ta mustra cu Narain si a demostra cu e unico lugar cu e por traha, ta na hospital. Y e asunto di edad tampoco mester ta un problema. A trece dilanti cu otro docternan cu tambe a yega e edad di 65 aña, si a wordo permiti pa sigui traha, cu e argumento cu no tin un reemplazante pa nan ‘ainda’. Aki hues ta argumenta cu hospital pues ta midi ‘cu dos midi’. Tambe, medicamente mira, Narain ta registra te cu por lo menos 2016 como docter y a pasa tur su testnan rekeri pa e ta ‘up to date’. Analisando tur esey, hues a bari e ponencianan for di mesa y a ordena hospital pa considera e acuerdo cu Narain, di 19 aña pasa, como valido ainda. Y si no cumpli, lo implementa e multa impone. Lesa e sentencia aki