Na Hulanda 210 dia prizon pa YdK cu a hinca otro durante ‘zomercarnaval’

WILLEMSTAD – Fiskal di Ministerio Públiko Rotterdam a pidi un kastigu di 24 luna di kua 8 luna kondishonal i un periodo di prueba di 2 aña mas trato sikiátriko bou di guia di Reclassering pa un akusado YdK i tambe prohibishon pa bebe alkohòl.

Tabata durante ‘zomercarnaval’ 29 di yüli di aña pasá ora ku a surgi un diskushon entre di e akusado YdK i un otro persona. Durante e diskushon aki e akusado a hinka su kontrinkante den su lomba ku un kuchú. Esaki tabata motibu ku fiskal a akusá e YdK pa intento di asesinato i sekundario maltrato severo.

E akusado a apelá riba defensa propio, pero korte no a duna oido na e aspekto aki.

Korte a para ketu na e akusashon di intento di asesinato i a splika ku pa por yega na prueba di esaki, korte ta wak ku ki forsa a hinka e víktima, ki tipo di kuchú a usa pa e atake aki tambe kon serio e hinká tabata.

For di e dosié ku korte tabatin, ta sali na kla ku e hinká tabata 3 cm hanchu i 3 cm hundu. Esaki ta nifiká ku no tabatin forsa ehekutá den e atake. E dosié no ta informá nada adishonal di e seriedat di e herida ku e víktima a haña i p’esei nan no por konkluí ku aki ta trata di un intento di asesinato.

E loke si nan por konkluí, ta maltrato severo.

E dia ei a start un pleitu entre di dos persona i a start un pelea. E víktima un dado momentu a pèrdè balansa i kai. Esaki tabata momentu ku e akusado por a kana bai o sea hala atras. Pero el a skohe pa ora e víktima tabata lantando for di suela, pa hinka su kontrinkante na su lomba.

E akusado ta bisa ku e víktima tambe tabatin un kuchú den su man, pero imágennan di kámaranan di seguridat no ta ilustrá  ku e víktima tabatin kuchú den su man. Esaki ta pone ku e apelashon riba defensa propio no por keda probá.

Konforme rapòrt di Reclassering t’asina ku nan ta mira algun faktor ku ta oumentá e riesgo riba kua atenshon spesial ta deseabel esta, mester di un programa di dia, no tin entrada, kontakto ku famia ta negativo i funshonamentu sikososial. Lo ta na su lugá pa imponé kontròl elektróniko i tratamentu ambulante.

Finalmente korte ta konkluí e kaso, i no ta haña intento di asesinato probá, pero pa maltrato severo si por keda aprobá. Aparte di esei Korte a splika ku nan no por kondená  e akusado konforme kastigu hubenil, pero lo apliká kastigu di adulto. Pues e akusado ta sali liber di intento di asesinato. E ta keda kondená na 210 dia di kua 82 dia kondishonal, pero mester sigui guia di Reclassering te dia ku nan haña ku e akusado di a kura i ku lo por hiba un bida normal bèk. Durante e guia di Reclassering e no mag di usa alkohòl. NOTA: Texto scirbi den Papiamento fonetico di Corsou.