Corte: A destrui decision di minister di Labor pa manda Kathy Paskel DWJZ pa 6 luna

ORANJESTAD – Huez awe dialuna a destrui e decision di minister di Labor Glenbert Croes pa manda directora di Dimas, Kathy Paskel traha 6 luna como hurista na Directie Wetgeving en Juridische Zaken. Abogado pa sra Paskel tabata mr David Kock. Tur 6 punto cu e minister a usa pa hustifica e motibo, a keda desbarata pa huez. Entre nan, no sigui instruccion di minister, haci denuncia contra e minister, postura di trabou y comunicacion incorecto na trabou, y ineficiencia den controla e operacion di Dimas. Un pa un, e huez a desbarata e puntonan. Di otro banda, mester bisa tambe cu e medida mientrastanto a vence caba, ya cu e tabata pa un duracion di 6 luna cu a vence diasabra. Loke sinembargo ta importante aki, ta cu tur e puntonan cu e huez a desbarata, ta pone cu no tin ningun motibo legal mas aworaki pa actua contra Paskel y cu conforme huez, Paskel su forma di opera, ta corecto. Mester bisa cu den un otro sentencia, tambe dicta awe, Paskel ta gana contra e minister. Aki tambe e abogado tabata mr David Kock. E biaha aki, ta e suspension di 3 luna aña pasa mei, cu mientrastanto a vence tambe. Aki tambe huez a duna Paskel un ‘clean slate’ for di tur acusacion cu e minister tabatin contra dje. Pa e sentencia prome, click AKI, mientras cu pa e sentencia #2, di suspension, click AKI.