Obispo Secco: Iglesia catolico ta sostene carnaval pero no baile y disfras indecente!

WILLSMSTAD - Iglesia Katóliko dialuna a duna su reaccion riba e tema di Carnaval. Segun Obispo Luis Antonio Secco, Iglesia Katolico semper ta sostené ekspreshonnan artístiko den diferente manera. Esaki nos por mira inkluso den nos misanan tantu lokal komo internashonal. Ekspreshonnan artístiko no ta keda representá solamente pa medio di arte pero tambe pa via di e kapasidat humano ku Dios a regalá hende i ku ta keda ekspresá pa medio di kanto, baile, komedia, músika i diferente otro manera. E ser humano ta usa e kapasidat aki pa e por ta kreativo, ofresiendo konstantemente kosnan nobo ku ta reflehá bunitesa i e aspekto sosial di e ser humano.

Karnaval ta un aktividat kultural pa medio di kua e ser humano por ekspresá su don di kreatividat. Obispado di Willemstad ta rekonosé ku no solamente e ta un aktividat kultural ku ta presentá su mes promé ku e temporada di ayúno i orashon ku ta Kuaresma, pero tambe ku Katólikonan a bin ta partisipá tantu den marcha komo públiko ku ta disfrutá kantu di kaminda.

Iglesia nunka a kondena Karnaval. Pero loke si ku konstantemente Iglesia a para ketu riba dje i ta urgí pa drecha, ta e degradashon ku ta trese den e selebrashon aki pa medio di bailenan i disfrasnan indesente i algun kansion ku letranan no apropiá, pero tambe uso eksesivo di alkohòl òf supstanshanan ilegal ku por hiba na komportashon agresivo.

Algun lo argumentá ku pa motibu di e komportashonnan no korekto i ku konstantemente ta bini dilanti, ta mas mihó pa un persona mantené su mes kompletamente alehá for di Karnaval. E posishon aki ta un manera pa presentá un respuesta na e situashon aktual pero ta kore e rísiko di pèrdè esnan realmente kulpabel pa e situashon aki, kual ta nos komo ser humano i e kultura ku ta impaktá esaki.

E posishon Katóliko no ta ku Karnaval ta malu riba su mes. E tumba, kalipso, Soka, elekshonnan di Prens ku Pancho, Rei i Reina, trahenan kreativo ku hopi bia ta keda asosiá ku e temporada promé ku Kuaresma, tin ku yuda nos mantené presente ku tin un tempu pa dibertí na un manera sano i un tempu di reflekshon profundo. Den Karnaval a keda demonstrá e kapasidat artístiko di nos hendenan pa medio di kreatividat ku a keda presentá tantu pa ku e disfrasnan, road piece i karosa.

Iglesia ta sostené arte, i semper ta enkurashá pa yuda spesialmente nos muchanan pa desaroyá nan kapasidat artístiko spesialmente den nos skolnan básiko i sekundario. P’esei e komunikado aki mester keda mirá komo un ekstenshon di e sosten artístiko aki, promoviendo desaroyo pa tur hende riba e nivel aki.

Katólikonan ku ta partisipá den Karnaval nunka mester lubidá e aspekto importante aki di loke realmente Karnaval mester ta, i alabes usa e oportunidat aki pa keda evangelisá ku e bon prinsipionan Kristian, invitando otro pa mantené un bon komportashon moral durante e periodo aki. E no ta djis un responsabilidat pero nos obligashon ku ta kuminsá ku un desishon personal di tur hende pa biba un bida Kristian korekto unda ku e bai i alabes yuda su komunidat pa hasi meskos.

Obispado di Willemstad ta indiká ku Evangelisashon no ta nifiká solamente resa pa otro i ser testigu di balornan outéntiko. E ta nifiká tambe ser visibel den e aspektonan kultural aki, tumando rísikonan prudente den nòmber di Dios, ofresiendo nos presensia, bida i komportashon ku ta yuda alsa norma i balornan di nos komunidat. NOTA: Texto scirbi den Papiamento fonetico di Corsou.