AGDA: No por a sigui bende ELMAR su producto na un perdida

AGDA: No por a sigui bende ELMAR su producto na un perdida

Posted on 02/5/2024 11:06 am AST | Updated on 02/5/2024 11:08 am AST

ORANJESTAD – Assosacion di Gasoline Dealers di Aruba (AGDA) no por sigui bende ELMAR su producto na un perdida mientras cu e trato ricibi di ELMAR ta indicacion cu nan no tin aprecio ni respet pa nos. Asina e asosacion a bisa dialuna den nan prome declaracion despues cu a surgi e ‘impasse’ cu ELMAR pa cu bendemento di coriente prepaga. Cu esaki tambe, nan a kibra nan silencio riba e tema. Segun e asosacion su comunicado dialuna, nan” (Associacion di Gasolin Dealers di Aruba (“AGDA”) ta desea di clarifica na comunidad di Aruba e decision unanimo, pero lamentabel cu AGDA a haya su mes ta tuma dia 1 di Februari 2024. No ta un decision facil pero uno necesario”.

COOPERACION

Segun AGDA, desde Augustus 2012 miembronan di AGDA a bin ta coopera cu ELMAR pa asina juda ELMAR pa brinda coriente Pre-Paga na e comunidad di Aruba. Esaki inicialmente den forma di un programa piloto, despues a bai over na un acuerdo cu ELMAR caminda cu miembronan di AGDA lo a bira partner exclusivo di ELMAR den benta di nan coriente Pre-Paga. Segun e asosacion, ta di menshona cu ELMAR su unico costo pa e bendemento di coriente Pre-Paga tawata nan programa y training, e station nan mes mester a cumpra un extra laptop y printer y suministra su mes cu papel tambe como recibo pa e cliente nan di ELMAR.

GASTO TA AUMENTA

“ Nos miembronan lo a bende e producto di ELMAR na comunidad, ricibiendo un commision dependiendo di volumen di benta. Desde 2017 pa awor e gasto nan pa juda ELMAR cu e benta di coriente Pre-Paga ta sigui subi sin cu ELMAR ta tuma nota di esaki, apesar cu AGDA a continuamente aserca ELMAR pa discuti esaki. ELMAR continuamente ta ahusta su prijsnan a base di cu prijs di crudo ta subi of algo otro. AGDA su miembro nan no tin e luho ey paso ta gobierno ta dicta nos margen di ganashi” e asosacion ta sigui bisa. Un ehempel di e subida di costo pa por brinda e servicio di bende coriente Pre-Paga ta cu salario di trahador a subi, corriente a subi y gastonan bancario a subi drasticamente pa nos miembronan (y tur otro comerciante na Aruba) ora pago wordo haci via caarchi. “Pa por splica e situacion cu nos ta confrontando actualmente, nos tin un ehempel pa aclaria. Si un cliente cumpra 100 florin di coriente na un stacion, e swipe esaki cu e carchinan nobo (Mastercard), esaki ta conduci na un gasto immediato pa e stacion di entre 2.7% pa 3.99% (depende di e banco) cu banco ta kita for di e station. For di e cliente su cuenta banco ta kita e suma di 100 florin, pero e suma cu nos miembro ta ricibi riba su cuenta di banco ta 96.01 florin, pues aki ta surgi e promer perdida pa e station di 3.99 florin riba cada 100 florin di coriente. Pero nos miembro si mester paga ELMAR 100 florin, aki ta surgi e di dos perdida pa e station di 3.99 florin, sin conta e gasto pa e transfer e plaka aki pa ELMAR. ELMAR ta paga e stacion 3 florin of 2.50 florin na comision y esey ta haci cu e station su perdida ta un poco menos, pero ta keda un perdida di 4.98 florin pa cada 100 florin di coriente Pre-Paga haci. Dus no solamente nos miembronan mester bende e producto di ELMAR, pero tambe mester financia ELMAR su operacion di benta na ELMAR su clientenan” nan ta sigui relata. Asina mes, despues di asina tanto contratiempo, e miembronan a sigura cu nan a keda coopera cu ELMAR, pa e comunidad di Aruba. Pa asina facilita e benta na Aruba y comunidad por a cumpra coriente Pre-Paga serca nos miembronan. Pero cu e realidad di e gastonan bancario y otro gastonan cu e miembronan ta enfrentando, lastimamente esaki pa hopi tempo caba no ta posibel mas.

COMUNICACION CU ELMAR.

Pa hopi aña AGDA ta purba convence ELMAR di e situacion dificil di nos miembronan cu benta di e coriente Pre-Paga, pero e unico interes di ELMAR semper tawata di su mes. Na September 2022 AGDA a sinta pa ultimo bes cu ELMAR pa purba ahusta e acuerdo cu a termina na 2018. Den e encuentro aki cu directiva di ELMAR, segun e asosacion, despues di a reitera cu nos miembro nan no por keda bende coriente Pre-Paga cu perdida, nos a wordo bisa, sin ningun emocion, cu ELMAR ta perdiendo placa cu nan acuerdo y cu nan (ELMAR:red) lo ta buscando un alternativa pa elimina e bendemento na e station nan. “Esaki ta e manera cu nos compania Estatal di Coriente ta trata su partner den e benta di coriente Pre-Paga di mas di 10 aña? Asina mes despues di e reunion aki a purba na varios occasion di jega back na mesa via e-mail, carta etc. tur intento a keda sin ningun reaccion di parti di ELMAR”.

SEÑAL DI BIDA

Por fin ta tin señal di bida di parti di ELMAR segun AGDA,  ora cu dia 31 di januari 2024, despues di 4’0r di atardi, ELMAR ta manda AGDA un carta avisando cu desde e dia siguiente, esta 1 di Februari 2024, coriente Pre-Paga lo por wordo bendi na comunidad di Aruba pa medio di Pay.aw di SETAR y cu awor nan kier AGDA bin sinta na mesa cu ELMAR.

FALTA DI RESPET

Esaki ta un falta di respet segun e asosacion, un insulto pa e miembro nan di AGDA y e directiva cu tawata un partner di mas cu un decada di ELMAR. Un sentimento cu cualkier persona den nan sapato lo por comprende ora di wordo trata asina aki. Asina mes AGDA su miembronan a sigui bende coriente Pre-Paga dia 1 di Februari 2024. E mesun atardi di dia 1 di Februari 2024, den un reunion di urgencia nos miembrecia den su totalidad a dicidi cu te aki nan a yega, awa a pasa hariña y nanno por sigui bende ELMAR su producto na un perdida mientras cu e trato ricibi di ELMAR ta indicacion cu nan no tin aprecio ni respet pa nos. “Nos organisation y su miembro nan ta keda profesional y como tal semper lo nos ta habri pa negosha cu un y tur, inclusivamente cu ELMAR, pero pa awor aki e decision ta keda firme. Na nos clientenan nos ta pidi nos disculpa pa e inconveniencia cu nos decision tuma y danki pa e comprension” e comunicado ta finalisa bisando.

  • A.T.A. a patrocina evento cu Reina Maxima como orador principal na Colombia

    A.T.A. a patrocina evento cu Reina Maxima como orador principal na Colombia

    ORANJESTAD – Oficina di turismo di Aruba a anuncia diabierna cu e oficina, cu hopi orguyo, a forma parti di un evento significativo den e mundo di Fintech na Colombia. E evento cu ta titula “Pagos Para Inclusión Financiera” a tuma luga dia 28 di februari na Bogota y tabata tin como invitado special y orador principal S.A.R. Reina Máxima. Reina Máxima ta Embahadora/Representante Special di E Secretario General di Nacionnan Uni cu ta para pa Inclusion Financiero y Desaroyo.

  • CAFt: “Aruba mester probecha e momentum pa haci economia mas resilliente”

    CAFt: “Aruba mester probecha e momentum pa haci economia mas resilliente”

    ORANJESTAD  – Economia di Aruba ta creciendo bon. Finansa publico tambe ta mustra un panorama posoitivo. Ta importante pa Aruba uza e posicion financiero actual pa pone finansa publico structuralmente na ordo y haci cu economia bira mas resiliente. Un maneho presupuestario prudente ta sigui ta mas importante cu nunca, teniendo cuenta cu e gastonan halto di interes. Reforma structural den seguridad social y riba mercado laboral ta percura pa mas resiliencia. 

  • Venezuela a exporta 270 ton di carga pa Aruba y Corsou den prome dos luna di 2024 caba

    Venezuela a exporta 270 ton di carga pa Aruba y Corsou den prome dos luna di 2024 caba

    CARACAS – Durante e prome 2 luna di 2024, Venezuela a aumenta su exportacion pa Corsou y Aruba cu un total di 270 tonelada di carga, for di e waf di La Vela den e estado Falcón. E aumento aki di comercio ta refleha un dinamica positivo di e relacion comercial cu Caribe Hulandes. Asina e vice presiddente di Camara di Comercio di La Vale de Coro, Juan Gotopo a bisa. Di e cantidad di tonelada menciona, mester bisa si cu mayoria tabata entre Venezuela y Corsou. Aki tabatin 235 tonelada di carta, mientras cu entre Aruba y Venezuela, ‘apenas’ 35 tonelada. E exportacion ta inclui productonan manera fruta, carbon vegetal, y mucho mas.Gotopo a splica cu desde cu a reanuda e comercio cu e islanan, a exporta un total di 2.875 tonelada di carga di e mesun waf Venezolano.  

  • VIDEO: Atia ta boga pa e ley laboral di Aruba bira uno mas progresivo

    VIDEO: Atia ta boga pa e ley laboral di Aruba bira uno mas progresivo

    ORANJESTAD – E gremio comercial Aruba Trade and Industry Association (ATIA) ta boga basta tempo caba pa haci e ley laboral di Aruba uno mas progresivo. E siman aki den e programa Noticiacla LIVE, e director Herrick Henriquez a remarca cu despues cu no a tende nada hopi tempo, e siman aki ta trata e tema cu gobierno y e respectivo minister. Click riba e video adhunto pa wak e segmento aki di e programa riba e tema menciona. 

  • Pa aña 2024 Aruba tin como meta pa yega na un total di 50 mil pasahero Colombiano

    Pa aña 2024 Aruba tin como meta pa yega na un total di 50 mil pasahero Colombiano

    ORANJESTAD /BOGOTA - Pa aña 2024 Aruba tin como meta pa yega na un total di 50 mil pasahero Colombiano, es decir mantene e mesun cantidad cu a obtene na aña 2023, e aña cu mas pasahero a atrae for di e pais aki, loke ta demostra cu nos ta kere den Colombia y ta confia den e industria turistico. Ademas, e rutanan nobo cu ta conecta Colombia cu Aruba tambe a permiti cu a yega na e cifra aki. Di un otro banda, na nivel Latino Americano, ta spera di crece cu 28% compara cu aña 2023. Lo mantene e mesun inversion di mercadeo similar pa e mercado Colombiano na aña 2023 cu hopi enfoke riba promocion y posicionamento di

  • ATA a lansa campaña 'El Efecto Aruba' p’e mercado Colombiano

    ATA a lansa campaña 'El Efecto Aruba' p’e mercado Colombiano

    ORANJESTAD/BOGOTA - Aruba a lansa su strategia global 'El Efecto Aruba', cu ta basa riba tur loke cada local ta transmiti, cada luga y cada experiencia cu e bishitante ta biba na Aruba y cu ta dura den tempo.

  • Powered by SETAR