AFBA: Ta un solo miembro a ofrece salario di tres mil florin pa retene dishwasher

ORANJESTAD – Despues di e ultimo conferencia di prensa di e asosacion di Aruba Food & Beverage Association (AFBA), a bin un ola di reaccion basa un declaracion di e COO Miriam Dabian. Aki pa mustra cu salarionan no ta malo di cierto trabounan, a haci e mencion cu un dishwasher ta gana 3 mil florin, pues esey no ta malo. Loke e no a menciona, ta cu tabata trata di un solo caso di un miembro, cu a haci e oferta ey pa retene e persona ey. Pero e forma con esaki a wordo bisa, ta como si fuera tur dishwasher ta gana e salario ey. E asosacion a haye ta clarifica esaki. Segun e relato, nan a bin cu e splicacion ‘sigurando Informacion Corecto den Medio di Speculacion’. “ AFBA por a tuma nota di informacion incorecto circulando relata na un entrevista cu a tuma luga despues di nos ultimo press conference ariba 30 di januari 2024 na unda nos enfoke tawata ariba e “labor shortage issue”, e comunicado ta cuminsa na bisa. “ Pa clarifica; locual a menciona ta e caso di locual 1 miembro mester a haci pa por a sigura su mes un dishwasher. Esaki sigur a wordo saca for di contexto” e asosacion a sigui bisa.  “ AFBA ta subraya su compromiso pa apoya pa salario husto den tur sector di cuminda y bebida y ta ahusta su mes cu e norma nan estableci den e mercado” e asosacion a finalisa bisando.