Censo: Problema di pasaporte hulandes no ta soluciona ainda

ORANJESTAD – E decision recien di corte pa otorga dos surnameño nan pasport hulandes bek, no ta aplicabel pa tur hende. Por lo menos, e no ta nifica automaticamente cu e grupo di mas of menos 38 hende afecta cu awor diripiente ta sin pasaporte hulandes, tambe por haya di nan.

KICO A SOSODE

E motibo cu e hobennan (morocho Sarman) a haya nan pasaporte, ta pasobra nan (s0) a haya un permiso ‘retroactivo’ di minister Sevinger entrega na 30 maart ultimo, cu ta bay bek te 1997, ora cu e problema a origina. Cu e permiso aki, Censo ta duna e persona e pasaporte bek. Sinembargo, aworaki, minister ta wardando un concepto di un Ministeriele Beschikking di parti di Censo y DIMAS. E concepto aki di Censo y DIMAS lo wordu traha conhuntamente cu partner di Censo y Immigrashon na Corsow y Sint Maarten.

SOLUCION

Segun  hefe di Censo, Sharin Luydens, unabes cu e concepto aki keda cla, nan ta entrega esaki na minister cu na su turno ta presenta esaki na conseho di minister pa aprobacion. Unabes cu esaki keda aproba, y bira un hecho, e ta nifica cu esey ta bira e solucion pa e demas 38 casonan cu ta wardando pa nan tambe bin na remarke pa nan haya nan Nacionalidad Hulandes y asina por saca un pasaporte di nobo. Sin esaki, Censo lo no por duna e pasaporte paso e persona no ta Hulandes. Pues, ta conseha e personanan afecta pa warda cu e Beschikking aki y unabes cu e wordu firma Censo conhunto cu DIMAS lo laga sa esaki den prensa. Semper y cuando ta prerogativa di Minister pa por duna un permiso retro activo, manera a sosode den caso Sarman, pero ta conseha tur hende pa warda e solucion unanime. Y cu e solucion ey, Censo no tin problema pa duna pasaporte hulandes bek.

E PROBLEMA

Manera ta conoci, un grupo relativamente grandi a keda perhudica algun tempo pasa, ora cu a bin sali na cla cu pa un equivocacion di interpretashon paspoortnan a wordu duna den e periodo di 1992 pa 2003 sin cu tabata tin derecho riba esaki. Desde 2009 tin control riba esaki y a bin resulta cu ora cu a bay renoba e pasaporte nan aki, cu nan no por haya e pasaporte paso nan no tabata Hulandes. A cuminsa un proceso pa wak con pa resolve e asunto aki y e proceso ey ta andando, y posiblemente lo keda cla pronto. Mientrastanto NoticiaCla.com a compronde cu oficina di ministernan ta wordo inunda cu peticion di hendenan cu ta afecta, pa ayudo, sin cu tin un solucion practico ainda. Algo cu awor nan tin cu compronde cu tin cu warda, te ora cu e caso keda soluciona.