Oficialnan halto di FIFA aresta awe mainta na Suiza!

ZURICH – Un cantidad di oficial halto di e organisacion mundial di futbol FIFA, a keda deteni awe mainta tempran na Suiza. Nan ta wordo sospecha di fraude, y cargonan di corupcion durante un periodo di 20 aña. Ta trata di casonan di e.o. soborno di mas di 150 miyon dollar. Entre esnan deteni tabata dos vice presidente Jeffrey Webb (Cayman Islands) y Jack Warner (Trinidad). E actual presidente Sepp Blatter no ta un sospechoso y tampoco tabata entre esnan deteni. E eleccion pa e presidente di FIFA ta continua normalmente diabierna awor.

ESNAN DETENI

Awe mainta 6’or ora di Suiza, oficialnan di Merca y Suiza a drenta e hotel unda cu e oficialnan di FIFA tabata kedando, y a aresta nan. Fuera di esnan menciona, tin tambe Eugenio Figueredo (Uruguay), Eduardo Li (Costa Rica), Julio Rocha (Nicaragua), Costas Takkas (Cayman Island), Rafael Esquivel (Venezuela), José Maria Marin (Brazil) y Nicolás Leoz (ex-presidente CONMEBOL).

IMPLICACION BLATTER?

Durante un conferencia di prensa awe mainta 11’or ora di Suiza, e vocero di FIFA a sigura cu Blatter mes no ta implica y ta keda candidato pa reeleccion como presidente diabierna. Mes momento no tin motibo pa cambia e sedenan di e proximo dos mundialnan di futbol (Russia 2018) y Qatar (2022). “Tur cos ta keda manera e ta”, Walter de Gregorio a sigura prensa internacional. Hopi a cuestiona e hecho cu e scandal aki no ta ‘afecta’ Blatter y cu e por ta sinta trankil mientras cu su oficialnan di mas halto, entre nan su dos vice presidentenan, a keda aresta. “Mi ta sigurabo cu e no ta bulando di alegria den su oficina. E ta hopi fastioso pa ta den un situacion asina. Pero nos ta apoya y sostene e investigacion. E momento si ta uno malo, pero nos no por haci nada. Ta nos mes a inicia e investigacion aki un aña pasa” de Gregorio a finalisa bisando.