Gobierno a haci inversion miyonario pa pronto tur polis tin su propio portafoon nobo nobo

ORANJESTAD – Cuerpo policial ta bay haya portafoon (radio di polis) nobo nobo, cu encripcion di mas sofistica pa evita cu por hack of  ‘kibra’ esaki e biaha aki manera cu e ta caso awor. Minister di husticia Rocco Tjon a confirma diaranson cu a autorisa compra miyonario di e sistema nobo e siman aki. Esey kier men cu pronto, segun e minister, pa prome biaha tur polis lo hay anan propio radio (portofoon). E mandatario a sigura cu un comision special a selecta e miho radio cu tin. No a bisa si ki marca di radio esaki lo ta e biaha aki. A sigura tambe cu tur auto nobo di polis (cu e ta sigura cu a yega Aruba caba), lo wordo ekipa cu ‘mobilofoons. 

PORTOFOON

Manera ta conoci antes por a scucha frecuencia di polis via un scanner regular cu bo ta cumpra na cualkier lugar electronico. Despues a inverti den esunan tetra, pa evita cu por ‘scan esaki’ riba un scanner regular. Sinembargo no a tarda hopi cu a ‘crack’ y ‘hack’ esaki, unda cu a logra haya e frecuencia, y a cuminsa parti esaki rond. Awendia, tin hopi cu tin e frecuencia, y ta usa esaki sin cu mester tin e portofoon mes. Tin te hasta polisnan cu a bay cera pa a yuda cu e proceso di parti informacion di polis, via e portofoon nan aki. Algun polis a wordo cera pa a ‘perde e radio’, y of a ‘fia e radio’ na cierto personanan. Na December ultimo, un polis a keda sentencia pa tabatin un netwerk completo di suministra informacion. E intencion di gobierno ta, cu e portofoon nan nobo aki, tur esey lo ta pa pasado. NOTA: E potret cu ta compaña e articulo aki, no ta necesariamente ilustra e radio nobo, sino ta solamente pa ilustra un portofoon, y no necesariamente ta esun 'nobo' cu ta wordo menciona den e articulo aki.