Minister di Defensa Hulandes: ‘Na e momento aki no tin menasa grandi pa e islanan ABC’

DEN HAAG/ ORANJESTAD / WILLEMSTAD - Awe no tin menasa haltu pa siguridat di Kòrsou, Aruba, Boneiru. Esaki minister di Defensa di Hulanda Kajsa Ollongren ta skirbi den un karta pa parlamento hulandes, Tweede Kamer, ku fecha 30 di yanüari 2024. Ollongren ta kontestá pregunta relashoná ku situashon entre Venezuela i Guyana tokante e region di Essequibo.

Manera ta konosí presidente Nicolas Maduro den luna di desèmber 2023 a hasi intenshon pa tuma over e region. Ollongren ta enfatisá ku e region ta situá mas ku 1300 kilometer for di Kòrsou, Aruba i Boneiru. Pa e motibu Ollongren ta enfatisá ku no tin motibu pa preokupashon.

I segun é, tambe pa Warda Kosta Karibeño e Plan di Aña (‘Jaarplan’) ta sufisiente pa ehekutá tur tareanan regular. “Si, pa motibu di e situashon aktual na Venezuela, ta nesesario pa tuma medidanan di mitigashon òf tin konsekuensianan pa e operashonnan i trabounan regular di Kuerpo di Warda Kosta Karibeño, Tweede Kamer lo wòrdu informá tokante esaki”, asina Ollongren ta skirbi. NOTA: E texto ta scirbi den Papiamento fonetico di Corsou.