Gruponan di carnaval cu a usa ekipo di zonido di forma ilegal, por haya multa pisa awor

ORANJESTAD – Por lo menos 3 grupo grandi den e proximo paradanan tin chens di haya un multa pisa pa a viola ley durante ultimo paradanan. Noticiacla a confirma cu e tres gruponan aki a y ta usando sistema di ‘relay’, esta un sistema di zonido special pa cubri un area grandi cu musica, cu aparatonan special cu percura pa 'plama' e musica riba un distancia grandi. Nan ta yama nan 'repeater links'. Pa haci esaki, e aparatonan ta traha riba frecuencia di radio. Cu e señal aki, nan por cubri y yega distancianan largo, cu ta pone cu p.e. un grupo por practicamente usa un banda so, pero cu por usa e zonido di e musica pa henter e distancia grandi cu e grupo ta cubri den e parada, pa medio di e aparatonan aki. De facto por usa menos banda e ora. Problema ta cu pa usa e ekiponan aki, mester tin permiso di Directie Telecomunicatie Zaken osea DTZ. Ora cu e persona of compania cumpra e ekiponan aki y drenta cu ne Aruba, nan (e aparatonan) mester keda registra pa DTZ, y esnan cu tin e aparatonan aki, mester haya un permiso pa por usa esaki. Sin esaki, e uso di e aparatonan aki ta bira illegal, osea contra ley pa cual tin castigo. 

ACCION

Noticiacla a compronde cu DTZ ta na altura di e situacion aki y ya caba ta tumando medida y ta haciendo tramite pa resolve e asunto. E forma ta pa registra e ekiponan aki ainda y paga pa esaki. Si esey no sosode, DTZ por duna orden pa confisca e aparatonan aki cu consecuencia cu e grupo por perde e aparatonan aki, y keda sin por transmiti e musica pa tur nan participantenan. Ademas por multa nan y tin otro tipo di accion. No ta descarta cu polis por actua y tuma medida ya cu e grupo ta actuando contra ley local. 

UN GRUPO SO

A compronde tambe cu lo tin solamente un grupo cu ta usando e ekiponan aki corectamente y cu tin e licencia necesario pa por opera e sistema y aparato aki durante nan parada. Tres otro grupo grandi, ta violando e ley y lo por haya nan mes mal sirbi den e proximo paradanan cu falta.