Molina: Intencion ta pa den 2024 Carnival Village haya un stage fiho

ORANJESTAD – Ta e intencion pa den 2024, Carnival Village na San Nicolas haya un stage fiho pa actividadnan. Asina parlamentario Alvin Molina ta informa. E ta recorda cu na 2022 a entrega un mocion pa eleva celebracion di cultura na San Nicolas. Aworaki den tratamento di Presupuesto di Pais Aruba pa 2024 e la entrega un otro mocion specificamente pa drecha Carnival Village, pa construi un stage fiho y muraya. Asina promotornan por organisa evento, kiosconan por sobrevivi  y sigui brinda servicio na nan cliente. Mi lo keda monitor di cerca si e mocion ta wordo ehecuta y con. “ I will be on they tail believe me”, Molina a sigui bisa. 

GHOST TOWN

Segun Molina, San Nicolas lamentablemente ta conoci como un “ghost town”. Desde cu rafinaderia a cera, a sobra masha tiki di tur e grandesa cu e districto a conoce. Pa drecha un “ghost town” bo mester trece movecion di hende. Carnival Village ta un bunita proyecto cu por trece hopi oportunidad pa cultura y por yuda eleva union den pueblo. Inverti den Carnival Village ta importante, paso cultura, mescos cu musica, arte y deporte, ta trece hende hunto, ta uni e pueblo cu eventualmente lo percura pa e barionan ta mas sigur y dushi pa biba aden. Construi un stage fiho y un muraya lo haci Carnival Village hopi mas apto pa organisa evenemento- y actividadnan, Molina ta sigui bisa. 

REACCION

Segun e parlamentario, por mira cu varios minister a reacciona positivo y ta sostene mi peticion. Minister di Cultura ya ta trahando riba e plan cu lo wordo ehecuta e aña aki, Minister di Infrastructura y Minister di Turismo ta duna nan cooperacion y aporte. Accion di gobierno y di pueblo ta rekeri pa yuda ‘make San Nicolas great again’.