Temporada di horcan 2024 lo ta ‘hopi activo’ y cu cambio cu e cono di pronostico

MIAMI – E proximo temporada di horcan (2024) ta pronostica di ta uno hopi mas activo cu normal. Mas specifico, 30% riba e norma normal y 50% riba e termino largo. E ekipo di Tropical Storm Risk (TSR) ta bisa cu e actividad nort Atlantico lo ta ‘hopi activo’. Un di e motibonan ta cu e fenomeno El Niño ta disparce y La Niña ta drenta cu ta nifica mas awa calor y mas tormenta cu nomber. Ademas ta premira un cambio grandi den patronchi di temporada di horcan. 

E PRONOSTICO

E pronostico ta pa 20 tormenta cu nomber, di cual 9 lo ta horcan y 4 di nan lo ta intensivo. Mayoria di e tormentanan lo ta entre lunanan di augustus y September 2024. 

CAMBIO DI CONO

Otro cos cu ta cambia e aña aki ta e cono iconico cu National Hurricane Center ta usa pa ubica e ‘caminda’ di e sistema tropical. Esaki lo cambia considerablemente e temporada aki.    Lo kita e enfasis di e cono ora cu e tormenta ta riba tera na Merca y lo pone mas enfasis riba e impacto, mustrando na su lugar, alerta y advertencia di e tormentanan tropical y horcan. Esaki ta nifica cu lo mira alerta tropicalnan activo na lugar di e cono ora cu ta trata di un sistema riba tera.  

PAKICO E CAMBIO

E cambio ta pa atende cu e problema con hende ta interpreta e menasa di un tormenta, basa riba e limite di e cono di pronostico di e trayector, cu ta respresenta solamente e trayectoria potencial di e centro di e tormenta y no e peliger nan mes di e tormenta. Un estudio realisa, ta mustra cu hende ta interpreta cu ta solamente e arean den e cono ta area di peliger y e area pafo di e cono, como areanan sigur of liber di peliger. Algo cu sigur no ta asina. Esaki pasobra e biento di tormenta por expande y surpasa e area di e cono, creando un percepcion robez.