Hooyboer: Disputa cu SMOA lo perhudica otro grupo di alumno

ORANJESTAD – Si no pasa e cambio di ley pa ‘resolve admision’ lihe, un cantidad di studiante atrobe lo sali perhudica ora cu aña escolar nobo cuminsa proximamente. Esaki ta pensamento di minister di enseñansa, Michelle Hooyboer-Winklaar na NoticiaCla.com. Si aña pasa, segun e mandatario, apenas un 44 pa 50 (for di 600) alumno di otro schoolnan so a logra bay di MAVO pa HAVO, e aña aki e ta premira cu esaki lo ta aun menos. Como tal ta pertinente pa cambia e ley cu ta duna gobierno mas ‘poder’ den e asunto aki. Esey ta parti di e ‘disputa’ actual entre SMOA (Stichting Middelbaar Onderwijs Aruba) y gobierno. Pesey a manda algun tempo atras un carta pa SMOA cu e splicacion. Y SMOA su reaccion, no tabata uno positivo pa e mandatario.

SITUACION ACTUAL

Segun Hooyboer, manera cu e situacion (y e ley riba e topico) ta aworaki, e mannan di gobierno den e asunto aki ta mara. Esaki den sentido cu no por intermedia pa loke ta e entrada di studiantenan na Colegio Arubano na Playa. Colegio (maneha pa SMOA), ta haci y deshaci y ta dicidi ken y ken no por drenta. Como tal nan reglanan di admision ta sigui y, segun e mandatario, ta perhudica e muchanan.

INTENCION

E intencion, segun e mandatario, no ta pa por dicidi ken tur ta bay scol y no, sino mas bien ta dune e chens pa cambia e reglanan di admision y e normanan, y e ora ta keda na e scol ken ta tuma. “ Ta trata di introduction di standardnan nacional y uniforme pa tur scol, mescos cu na Hulanda y Curaçao” e mandatario a bisa NoticiaCla.com awe mainta. Por lo menos, e ta ‘cambia’ e normanan di tal forma cu mas mucha por drenta Colegio. E mandatario no ta kere cu muchanan por wordo perhudica di e estado ey, manera cu e situacion ta aworaki.

METEMENDO POLITICO

E hecho cu kier ‘mete’, no ta e punto y segun Hooyboer, tin prueba cu na Hulanda hasta a trece cambio (lesa e documento aki), unda cu secretario di estado pa enseñansa, Dekker, a cay aden y percura pa evita ‘posibel abuso di admision’ pa medio di un cambio di ley. Y esaki ta loke e mandatario kier logra. E ley ta prove e framework y no ta permiti schoolnan pa cambia cos segun nan deseo. Manera e mandatario a bisa, ‘problema ta cu no tur cos ta den su man y ta depende con lihe keda cla cu e ley pa e por wordo trata y pasa. Mas lihe e pasa, mas lihe por trece cambio. “Si esaki no sosode lihe, un otro grupo di alumno lo keda perhudica ora cu aña escolar nobo habri” Hooyboer a sigui bisa. “ Si studiantenan logra e normanan aki, nan admision ta garantisa. E normanan lo ta stipula pa e comision, segun Hulanda y aproba pa minister” e mandatario ta finalisa bisando. De hecho, e mandatario ta recorda cu parlamento recientemente a aproba den forma unanime pa medio di un mocion (lesa e mocion aki).