Wever: A pidi Andre Bosman (VVD) pa bay ‘suave’ cu Aruba

DEN HAAG – Hulanda no mester baha pisa riba Aruba, awor cu e lo tin parti di e control financiero di nos isla den su man (pa medio di CAFT). Cu e.o. e intencion aki, e lider di partido MEP, Evelyn Wever Croes a topa awe cu parlamentario di VVD, Andre Bosman, un ferviente critico di e.o. Aruba y Corsou. Segun Wever Croes, mientras e reunionnan di tripartite tabata andando, e la cuminsa cu reunionnan na parlamento hulandes den preparacion pa e IPKO. Un di nan tabata pues cu Bosman.

CONTENIDO

"Mi a splike cu e situacion na Aruba ta dificil y cu mi ta hopi preocupa pa e bienestar en bista di tur e medidanan na caminda. Pasobra no ta pueblo a gasta e placa y pues no ta husto pa pueblo bai paga awor” Wever a bisa. E la bisa cu e la enfatisa tambe con equiboca e prioridadnan di gobierno ta, pasobra nan ta prefera di aumenta e BBO cu 1% en bes di manda dos minister cas.

MANEHO FINANCIERO

“Mirando cu ta for di Hulanda lo fiha e maneho financiero di nos pais, mi peticion na dje tabata pa no baha cu man pisa riba nos pueblo. E reunion a bai bon” Wever a sigura den e comunicado. Segun Wever mas y mas portanan ta habri pa MEP. “No ta tur ora mi ta di acuerdo cu sr Bosman, sinembargo ta importante pa splik'e cu no ta husto cu awor ta pueblo mester paga pa erornan di Mike Eman y su gabinete" Wever Croes a finalisa bisando. Diaranson, e reunion di IPKO mes ta cuminsa.