CAFT na Gobierno: Usa surplus pa paga debe cu tin aworaki

ORANJESTAD – E colegio di supervision financiero CAft ta conseha pa Gobierno utilisa e totalidad di e resultado positivo inespera (surplus) di entre 170 pa 190 miyon di gobierno di Aruba pa 2023, pa amortisacion di debe, osea usa e placa aki full pa paga e debe y no como inversion. “ Esaki como cu den e fase aki e realisacion di inversionnan adicional na 2023 no ta realistico mas” e colegio ta sigui bisa den su reaccion di e rapport di gobierno riba e di dos cuartal di 2023. Ayera noticiacla a relata caba riba e keho di CAFt riba e tardansa structural di gobierno di Aruba pa manda e raportahenan di cada cuartal. 

SURPLUS

CAFt ta bisa cu apesar cu nan no a ricibi informacion formal di implementacion, e si ta dispone di cifranan di realisacion mas actualisa di e ingresonan di impuesto te cu september y e imagen mas actual di e resultado anticipa di e sobra entidadnan di e sector colectivo. CAft a ricibi e cifranan aki di Aruba y a involucra nan den e evaluacion di e di dos UR. A base di e informacion aki, CAft ta anticipa cu Aruba lo por sera e aña 2023 cu un surplus di financiamento di e sector colectivo di aproximadamente AWG 170-190 miyon.

ARUBA TA CUMPLI PERO USA SURPLUS PA PAGA DEBE

E montante aki ta mas cu AWG 60 miyon mas alto di loke a presupuesta den e di dos modificacion di proyecto presupuestario (OBW) 2023 y e Nota di Otoño (Najaarsnota) di Aruba. Cu esaki, na 2023 Aruba ta cumpli ampliamente cu e norma presupuestario central. CAft ta conseha pa utilisa e totalidad di e resultado positivo inespera aki pa amortisacion di debe, como cu den e fase aki e realisacion di inversionnan adicional na 2023 no ta realistico mas. Considerando e hecho cu e resultado lo sigui impacta na 2024, CAft ta pidi Aruba pa adapta e presupuesto 2024 na esaki. Por lesa e conseho completo AKI.