Salud Publico: Dos siman mas pa regla “carchi berde”

ORANJESTAD – Departamento di Salud Publico a extende e periodo pa regla ‘carchi berde’ cu dos siman mas. Esaki debi na e aglomeracion di hende e ultimo dianan y e problema pa logra atende cu tur hende na tempo. “Nos ta consciente di e interes grandi cu tin awor pa renoba e carchi berde of pa aplica pa dicho permiso” minister di Salud Alex Schwengle a bisa. Esey ta e motivacion pa e extension. E intencion tabata pa cuminsa cu control for di dialuna, pero esey a cambia awor. 

EXTENSION

Tambe nos ta consciente di e limitacion di e personal eynan pa atende e fluho abnormal cu tin awor. Pesey nos ta duna tur hende dos siman di tempo mas pa regla nan asuntonan prome cu start control tur rond di nos isla”, asina Minister dr. Alex Schwengle, encarga cu maneho di Salud Publico a enfatisa.

FILA LARGO

Ultimo dianan por nota filanan largo dilanti Departamento di Salubridad Publico na Oranjestad. Esaki tin di haber cu e interes cu tin di empleadonan trahando directamente cu cuminda of bebida cu awor si ta buscando nan “carchi berde” cu ta duna nan permiso pa por atende cu cuminda y bebida na cliente. Sin un carchi, e empleado no por traha y consecuentemente por hasta cera e establecimento!

CONTROL

Desde aña pasa caba, e seccion di Malesanan Contagioso di Departamento di Salubridad Publico a start cu control den varios area, den cual a bishita bar y restaurantnan. Varios establecimento, sin distingui entre esunnan grandi of chikito, di nomber internacional of local, tur cu no a cumpli mester a cera te na momento cu por a demostra cu nan empleadonan tabatin e carchi cu ta sirbi como permiso cu nan por funciona y sirbi publico.

TARDANSA

Mientras cu a imagina cu e controlnan lo tabatin un efecto preventivo, toch hopi empleado no a bay busca nan carchi of a lag’e caduca. Cada permiso ta valido pa 1 aña. Awor cu a anuncia cu control lo cuminsa e siman aki, a nota interes masha grandi pa busca prolongacion of otronan cu awor ta aplica pa por haya dicho permiso. Claro cu esey a causa fila pero di otro banda ta demostra tambe e cantidad di hende cu tur dia ta sirbi nos comunidad cuminda y bebida den establecimentonan comercial SIN cu nunca nan a pasa un test di malesanan contagioso. Esey ta un peliger pa salud publico!

CONTROL

E controlnan aki ta den man di Servicio di Higiena di Departamento di Salubridad Publico, hunto cu DOW y cu Polis. Pa por haya un carchi cu ta autorisa Bo traha como un “Foodhandler” ta rekeri un bishita na e seccion di “Foodhandler” na Servicio di malesanan Contagioso(DBZ) di Departamento di Salubridad Publico pa keur y controla. Mester tin un ID valido, sea ta un rijbewijs, paspoort of cedula. Mester paga 30 florin pa stampia y eynan mes lo saca potret. Ta duna e aplicante un pochi pa muestra di laboratorio y ta haya un formulario pa saca un potret di Thorax na Hospital, na balor di 75 florin of na ImSan na balor di 55 florin.

DECLARACION

Ora saca un “Gezondheidsverklaring”, esta e carchi berde, mester presenta personalmente y e procedura ta tarda 2 siman. E seccion ta traha entre 8:00am pa 12:00pm y for di 2:00pm pa 4:00pm. E unico laboratorio autorisa pa test sushi humano ta Laboratorio Nacional di Aruba, pues e laboratorio oficial di Departamento di Salud Publico. Nan ta e unico cu ta duna servicio di microbiologia.