Na Corsou yiu muher a hiba tata corte pa un disputa financiero

WILLEMSTAD - Un disputa entre di un yu muhé kontra di su tata ku tin hopi tempu andando ayera a keda konkluí ku un rechaso di e demanda, pa motibu ku e periodo di kobra o sea reklamá un suma di plaka a vense. Segun lei despues di 5 aña no por apelá mas riba un suma di plaka ku mester keda pagá o sea kanselá.

Durante tratamentu di e kaso ku Z.C-W. yu muhé a entamá  kontra di su tata J.J.W., hues a pidi MCB pa saka statement nan di e periodo di 1985 te ku 1988, p’asina sa kon estado di e kuenta bankario den e periodo menshoná tabata.

Pa medio di e-mail fechá promé di novèmber 2023, MCB a informá ku, den kuadro di e periodo legal ku tin di warda statement i tambe kambio di sistema di banko na 1993, nan no tin e informashonnan ku a keda pidí mas.

Na opinion di korte esaki ta ilustrá e problema ku partidonan envolví den un prosedura ta enfrentá despues di un periodo di tempu asina largu.

P’esei, apelando riba ‘verjaring’ di parti di J.J.W. den e kaso aki ta un petishon rasonabel.

Tur kos a kuminsá ora ku na yüni 2015, Z.C-W a risibí un chèk di 14.000 florin di su tata, ku a bisa ku el a pone e suma di plaka aki bèk, un suma ku el a lanta for di e kuenta di spar bankario konhunto.

Esaki tabata motibu ku  Z.C-W a pidi e buki di banko di spar, pero el a haña solamente e promé i e último página, ku ta mustra un saldo final di 101 florin. Den e kopianan ku Z.C-W a presentá, e mutashonnan ta visibel for di 1992 te ku 2000, esei tabata un momento, esta na yüni 2015, ora Z.C-W a realisá ku e plaka di su penshun ku el a kere tabata riba e kuenta, no tei mas.

Na opinion di Korte, for di e momentu ei, Z.C-W mester a apelá na su tata, si ta nesesario, den korte, pa e tata duna kuenta i rason di e responsabilidat ku e tabatin di e maneho di e buki. Di tur manera e momento ei, a kuminsá e periodo di ‘verjaring’. Segun artíkulo 3:307 i 3: 310 di Kódigo Sivil hulandes, e periodo ei ta sinku aña.

Esaki ta nifiká ku no por kobra mas i konsekuentemente e demanda di e yu muhé mester keda rechasá.

Pero ta trata di un disputa familiar ku tin mas kos andando, esta influensia di kasá di e yu muhé a pone e yu muhé bai kontra di su tata. Segun e tata, tin un gañamentu formal den e kaso aki.

Pero pa e momentunan aki e kaso ta tras di lomba basá riba ‘verjaring’.

Korte a duna di konosé ku pa motibu di e relashon familiar, e gastunan di e proseso lo ser likidá entre e partidonan, di manera ku kada parti ta asumí su mes gastunan. NOTA: Texto ta scirbi den Papiamento fonetico di Corsou.