Prome Minister Mike Eman cu pareha Real na Washington DC

ORANJESTAD- Prome Minister Mike Eman, hunto cu prome ministernan Ivar Asjes di Corsou, Marcel Gumbs di Sint Maarten y Minister Bert Koenders di Asuntonan di Exterior, ta compaña Rey Willem Alexander y Reina Maxima riba nan biahe pa Washington otro siman. Na Washington drs. Andy Lee ta uni su mes na e delegacion di Reino. Nan presencia na Washington ta riba peticion di Pareha Real.

AGENDA

Dialuna ,dia 1 di juni ta cuminsa cu e diferente compromisionan cu tin riba agenda. E biahe na Washington ta termina dia 3 di juni y e Pareha Real hunto cu Minister Koenders ta sigui nan biahe pa Chicago. Relaciona cu Memorial Day dia 25 di mei, e delegacion ta bishita Arlington Cemetery pa recorda esnan cu a muri den e ‘Civil War’, pero tambe esnan cu a perde nan bida durante otro gueranan. Na e cementerio ta bay tin un ceremonia di ponemento di krans. Despues ta sigui un encuentro cu Banco Mundial na unda Aruba ta presenta su agenda di sostenibilidad. Un bishita na miembronan di Congreso Mericano ta siguiente riba agenda. Eynan lo discuti y intercambia di pensamento riba temanan importante y di interes mutuo. Den oranan di anochi e delegacion hunto cu Pareha Real ta bay mira e wega di baseball entre Washington Nationals y Toronto Blue Jays. Durante e biahe aki Rey Willem-Alexander y Reina Maxima tin un encuentro cu President Mericano Barack Obama. E biahe oficial na Washington ta dura te cu 2 di juni. Durante su presencia na Washington Minister President Eman lo tin otro reunionnan importante cu institutonan gubermental y universidadnan pa avansa temanan di importancia pa Aruba.