Croes: WEB mester soluciona e problema di blackout ‘once and for all!’

ORANJESTAD – E ultimo blackout di diadomingo, ta inaceptable!. Asina minister encarga cu WEB, Glenbert Croes a bisa Noticiacla dialuna mainta den su reaccion pa e portal aki. “WEB mester soluciona e problema di blackout ‘once and for all!’, e mandatario a sigui comenta na Noticiacla. Cu esaki, e mensahe ta cu no solamente e director, pero tur den e compania mester traha duro awor pa evita un proximo situacion asina.    E ta bisa cu e ta compronde cu e trahadonan di WEB ta haciendo tur posibel pa evita un situacion asina. Di otro banda, riba pregunta di Noticiacla, e ta di acuerdo cu un simple ‘despensa’ no ta suficiente mas pa trankilisa e comunidad despues di un blackout. E mester ta un splicacion completo di kico tur a pasa. Sinembargo, ta conoci cu e splicacionan aki hopi biaha ta hopi tecnico y no ta duna mucho espacio pa un hende cu no tin conocemento technico, compronde. E ciudadano kier sa kico ta haciendo pa e simplemente no sosode mas, y punto. Esaki ta inclui e propio minister, cu ta admiti na e portal aki cu e no ta un experto riba e tereno aki. Pero, e ta bisa tambe cu realidad ta keda si, cu na final, e ta keda esun responsible pa e compania. Y como mandatario, e ta responsible y tin e autoridad pa forza tur partido na mesa y yega na e miho solucion pa evita mas blackout. E la priminti cu e siman aki mes e ta reuni cu tur esnan responsabel, y kier tende algo cu ta convence cu tin solucion once and for all!.  

CABEZ MESTER CAY

Riba e pregunta cu si cabez mester cay, e mandatario a bisa cu e mientras cu e director ta esun finalmente responsible, no por benta tur cos riba dje tampoco. Pero e kier sa si di e director, kico ta e problema cu atrobe e aparatonan di RECIP ta fayando. Pa loke ta e inversionnan haci, Croes ta recorda cu e no ta cualkier inversion, sino cu e ta hopi placa e aparatonan nobo di RECIP a costa y cu e tempo ey a determina cu esey ta e miho inversion pa haci. E sistema completo ta un inversion di mas di 280 miyon florin y toch ainda tin problema cu coriente. Basa riba e situacion cu ta trahando riba e problema, mester awor si, saca afo kico realmente ta e fayo cu tin ripiticion di problema di coriente. Por a saca afo di e minister pues ta poniendo basta presion riba WEB completo, pa resolve e problema e biaha aki di berdad, pa evita cu tin mas blackout.