Polis a topa dos bulto grandi di droga riba lama

ORANJESTAD - Un tip valioso a drenta na polis diamars alrededor di 1:00pm, bisando cu tin dos bulto grandi ta drif riba lama. Polisnan maritimo, cu awor ta conta cu mas ekipo, miho entrenamento y experiencia, a drenta accion mesora. Un rato despues e prome boto di Polis a logra yega na altura di Barcadera y a topa berdad cu dos bulto grandi. A saca nan for di lama y a hinca nan den e boto di Polis cu a percura pa hiba nan tera. Asina cu a yega waf a entrega e bultonan na Departamento di Crimen Organisa di Cuerpo Policial Aruba, cu awor lo mester sigui cu e investigacion pa saca afo ki tipo di droga e ta exactamente. Tambe investigacion tactico y strategico lo tin cu conduci na yega na e posibel sospechoso(nan) responsabel pa e droga aki, sea yegando of saliendo for di nos isla. Un cos ta sigur, awor e droga ta bou custodia di autoridadnan policial den beslag, pues lo no subi mercado, sino ta cla pa wordo destrui pa semper. Di e forma aki ta bolbe dal baho mundo un sla duro, den un esfuerso continuo di Polis pa combati criminalidad den un forma strategico y duradero. Claro, cualkier ayudo adicional na informacion of tip valioso ta bon bini. Por hasta yama den forma anonimo via number di telefon 11141 pa yuda den soluciona e caso y yega na esunnan responsabel pa e droga aki. Tur informacion, pa con tiki e por ta, lo por ta un aporte den e investigacion andando.