Na Corsou Conseho di Minister ta trata proposicion pa aboli ley di 12,5 porciento

WILLEMSTAD  – E proposishon pa revoká e ordenansa di lei pa kòrta den kondishon laboral di ámtenar i trahadónan e k i v a l e n t e k u 1 2 , 5 porshento ta riba agènda di reunion di Konseho di Minister djárason awor, 24 yanüari. Despues di un aprobashon di parti Konseho di Minister e proposishon ta bai e órgano di konsulta CGOA pa diskushon ku e sindikatonan ku ta representá trahadó nan públiko. Asina minister di Maneho, Planifikashon i Servisio Públiko, Ornelio ‘Kid’ Martina ta konfirmá pa EXTRA. E intenshon tabata pa promé ku fin di aña a pasa e proposishon “op stuk” i pa den promé reunion di Konseho di Minister di 2024 a ratifiká e desishon aki. Pero no a logra mas den e intenshonnan aki. Durante reunion di CGOA djaweps siman pasá a bolbe deliberá riba e proposishon pa revoká e lei di 12,5 porshento. Asina ku e proposishon yega CGOA lo trata i aprobá esaki pa e bai bèk Konseho di Minister ku lo manda e proposishon parlamento, miéntras ku Hunta di Konseho ( “ Raad van Advies”) tambe ta duna e konseho riba e lei. Pa e 5 sindikatonan representá den e Komishon Sentral di Sindikatonan, CCVV ta importante ku ta abolí e lei pa kòrta den kondishon laboral di ámtenar mas lihé posibel. Ta ora abolí e lei por hiba deliberashon ku gobièrnu riba pago di indeksashon, “loontrede” i lumpsum 2023. Gobièrnu a paga dia 21 de sèmber último indeksashon di salario ku forsa retroaktivo te 2019 i 2020. Den 2024 ta pendiente pago di “ loontrede ” i lumpsum 2020 tambe. Pago di indeksashon, “loontrede” i lumpsum 2023 ku tur probabilidat lo tuma lugá na 2025. Tin un diferensia di opinion sinembargo entre e sindikatonan riba e fecha ku e proposishon pa abolí e lei pa kòrta ku 12,5 porshento den kondishon laboral ta drenta na vigor. E proposishon di gobièrnu ta bisa ku esaki lo ta ku forsa retroaktivo te 1 yanüari 2023, pero e sindikatonan ta di opinion ku mester bai bèk te 1 yanüari 2022, igual ku ta e fecha ku a duna ámtenarnan derecho atrobe riba pago di plaka di fakansi i tur nan dianan di fakansi. Gobièrnu a duna e dos derechonan aki, ku tambe tabata parti di e 12,5 porshento bèk na e ámtenarnan kaba. Esaki a sosodé pa medio di un dekreto nashonal. Pero pa revoká e otro medidanan esta ku ta fris pago di “loontrede”, lumpsum i indeksashon di salario mester bai parlamento ku un lei pa abolí e lei di 2020. Na 2020 gobièrnu pa lei a fris tur kondishon laboral debí na pandemia di Covid-19. A risibí sosten di likides for di Hulanda i den esaki a palabrá ku ta kòrta den e kondishonnan laboral den forma di entrega di ora di fakansi i a fris pago di plaka di fakansi, “loontrede”, 3 porshento lumpsum i indeksashon di salario. E sosten di likides a monta un total di 911 mion florin. Na òktober 2022 mester a paga e suma aki bèk den un tiru, pero mirando ku na e momento ei ainda Kòrsou no a rekuperá ainda for di e krísis ekonómiko okashoná pa e pandemia di Covid-19. Konsekuentemente Hulanda a duna 1 aña èkstra di tempu pa paga e debe bèk. Na òktober 2023 a re finansiá e debe kontra un tasa di interes di 5,1 porshento, pendiente un solushon duradero pa problema di solvabilidat di kompania di seguro ENNIA Caribe Leven. Kòrsou i St. Maarten a haña 1 aña di tempu pa presentá ku un solushon duradero pa garantisá pago di penshun na klientenan di ENNIA Caribe Leven. Den kaso ku ekspertonan Hulandes duna lus bèrdè na e solushon ku presentá kuné e tasa di interes riba re finansiamentu di e debe di Corona ta baha te na 3,4 porshento pa aña. NOTA: E texto ta scirbi den Papiamento fonetico di Corsou.