E prome blackout di Aruba pa 2024 a dura casi 2 ora

ORANJESTAD – Despues di casi 2 ora cu Aruba a experencia su prome blackout pa 2024, coriente a cuminsa bin bek atrobe. Tabata binti pasa di 8 di mainta cu WEB a informa cu a haya e fayo cu a causa e blackout y cu nan a cuminsa e proceso cu ELMAR pa reestablece coriente atrobe. Apenas 5 minuut prome, tabatin un mensahe cu ‘ainda no a identifica e problema y cu no tabata sa cuando e lo a tarda’. Coriente a bay algo despues di 7’or di awe mainta causa pa un problema den e motornan di RECIP, y mas of menos un cuarto pa 9, e la cuminsa bin bek poco poco na varios parti di Aruba.  Ultimo biaha cu tabatin un problema cu coriente tabata net prome cu fin di aña, pero esey tabata un brown out, esta no un apagon completo. E ultimo apagon tabata casi un aña pasa y aki despues di 45 minuut e la cuminsa bin bek, aunke a dura casi 2 ora pa tur hende haya coriente.