WEB: Fayo den motor di RECIP a causa blackout diadomingo

ORANJESTAD – Diadomingo mainta algo despues di 7’or di mainta, un fayo den un motor den e planta di RECIP na WEB, a resulta den un reaccion cadena, finalisando den un blackout. Blackout kier men cu tur caminda na Aruba coriente a bay. Aunke hende ta confundi e terminologia cu apagon anochi so, esaki ta wordo usa tambe ora cu coriente completo bay tambe den dia cla. Prome ta ELMAR a confirma pa noticia cla cu tabata trata enberdad di un blackout, y despues pa 7:24am, WEB tambe a confirma e blackout y e motibo. ‘No ta conoci ainda cuanto lo dura pa recupera e suministro di coriente” WEB a informa. Mester bisa cu awa tambe a bay na varios caminda. No ta prome biaha cu e motornan RECIP ta causa e problema di blackout. Na 2022 ya caba ora cu e motornan a keda recien instala, esaki a crea problema, y a yama nan 'kinderziektes'.