Resultado eleccion parlamentario St. Maarten a bira ofisial

PHILIPSBURG- Resultado ofisial di elekshon parlamentario di 11 yanüari ta konosí. Despues ku ofisina elektoral sentral (”Central Voting Bureau”) di St. Maarten a tuma 3 dia pa konta tur voto emití di nobo.

E resultado final no a trese kambio kompará ku e resultado preliminar. National Alliance a keda e partido mas grandi ku 3.455 voto i a haña 4 asiento. Partido UP ku 2.814 voto a optené 3 asiento.

Tin 4 partido ku a haña 2 asiento kada unu. NOW ku 1.481 voto, PFP ku 1.717 voto, DP ku 1.970 voto i URSM ku 2.028 voto. Tabatin un total di 14.443 voto bálido emití. Un total di 66 porshento di e poblashon a hasi uso di su derecho di voto.

Tampoko a bini kambio den e kandidatonan eligí pa drenta parlamento. E kandidatonan ku lo drenta parlamento ta Egbert Doran, Sylveria Jacobs, Cloyd Marlin i Ardwell Irion pa National Alliance. Pa partido UP e kandidatonan ta Omar Ottley, Akeem Arrindell i Francisco  Lacroes.

Luc Mercelina i Shamira Roosenburg ta drenta parlamento pa URSM. Sarah Wescott-Williams i Grysha Heyliger-Maarten ta bira e parlamentarionan pa partido DP. Pa PFP e kandidatonan pa bira parlamentario ta Ludmila de Weever i Melissa Gumbs i partido NOW su kandidatonan ta Christophe Emmanuel i Kevin Maingrette.

E kandidatonan aki ta haña un karta awe di ofisina elektoral sentral pa nan indiká ku nan ta aseptá pa bira miembro di parlamento. Tambe tin un reunion planiá pa awe atardi ku tur e kandidatonan pa informá nan di e proseso ku mester sigui tuma lugá te na momento ku e parlamento nobo tuma asiento dia 10 febrüari awor.

Entretantu partidonan URSM, DP, PFOP i NOW a firma kaba un akuerdo di gobernashon inkluso un repartishon di ministerio entre e partidonan. Lider polítiko di partido USRM, dr. Luc Mercelina ta kandidato pa bira próksimo promé minister di St. Maarten. NOTA: E texto ta scirbi den Papiamento fonetico di Corsou.