Acuerdo entre Hulanda y St Maarten riba problema integridad

DEN HAAG - Sint Maarten y Hulanda a yega na un acuerdo riba e problema di integridad riba e isla menciona. E isla ta haya un asina yama ‘comision di integridad independiente’ of ‘camber di integridad. Minister Dennis Richardson (husticia St Maarten) y Ronald Plasterk (Asuntonan di Reino) a firma e protocol diasabra ultimo den cual e palabracionnan ta wordo menciona.  

CONTENIDO

A cera acuerdo tambe riba e asistencia pa y fortificacion di e mantencion di ley na St Maarten, fortifica e combatimento di violencia, atraco y traficacion di hende. Ambos mandatario ta hopi contento cu e acuerdo aki a wordo sera.

TAREA

Cu e formacion di e comision di integridad, ta duna contenido na e consehonan deriva di e investigacion riba integridad. E comision aki ta haya autoridad independiente pa por duna conseho. Tambe e comision aki por inicia investigacion y haci denuncia ora ta necesario. E camber di integridad lo wordo concretisa pa medio di un ley, y ta raporta tanto na gobierno di St Maarten como gobierno di Reino.

SPECIFICACION

E fortificacion di e asistencia legal ta tuma lugar tanto na e cuerpo policial di St Maarten, Landsrecherche, RST y Koninklijk Marechausee.