Hunta di Comisario nobo di Post Aruba NV a keda presenta

ORANJESTAD - Minister Geoffrey Wever ta introduci e constelacion nobo di e Raad van Commissarissen di Post Aruba N.V. Diaranson 17 januari, Minister di Asuntonan Economico, Comunicacion y Desaroyo Sostenibel, mr. Geoffrey Wever, a introduci e constelacion nobo di e Raad van Commissarissen (RvC) di Post Aruba N.V. E Raad van Commissarissen di Post Aruba N.V. nobo lo fungi den nan funcion desde 1 februari 2024 y ta consisti di e siguiente profesionalnan: señor Antonio Carlo (President-Commissaris), señor Jacques van der Scheer (Plaatsvervangend voorzitter), señor Edwin Tromp (Commissaris) y señor Henk Timmermans (Commissaris). 

E constelacion nobo di Raad van Commissarissen di Post Aruba N.V. ta consisti di profesionalnan cu amplio experiencia. Señor Antonio Carlo ta un abogado cu experiencia extenso y tin su propio bufete y a fungi tambe como consehero legal pa diferente compania y gobierno y tin amplio experiencia como miembro di directiva. Señor Jacques van der Scheer ta traha den mundo di seguro y tin experiencia extenso den funcionamento di businesses, organisacionnan y management. Señor Edwin Tromp tin experiencia amplio di mas di 48 aña den mundo di banking and finance y tin experiencia tambe como miembro di directiva di diferente compania. Señor Henk Timmermans ta Register Accountant cu experiencia amplio den e area aki y den mundo di seguro, cu background den ley y experiencia como miembro di directivanan tambe. 

Minister Geoffrey Wever ta gradici e Raad van Commissarissen di Post Aruba N.V. saliente: Señor Theo Kock, Señor Richenel Bello, Señor Henry Baarh y Señora Marline Pieters.

“Mi ta contento di introduci e constelacion nobo di Raad van Commissarissen di Post Aruba N.V. consistiendo di profesionalnan den area di ley, business, management, banking, finance y accounting y ta sigur cu nan lo haci un bon trabou den enfrenta e challenges y opportunidadnan di Post Aruba N.V.", segun minister Geoffrey Wever, kende ta deseanan hopi exito y sabiduria den e trabounan cu tin nan dilanti y ta agradici cu nan a haci nan mes disponibel pa cu nan conocemento haci un aporte positivo na Post Aruba N.V.”