Aruba y Hulanda papiando cu otro awe den preparacion pa RMR di diabierna

DEN HAAG/ORANJESTAD – Tin indicacion cu diabierna awor den e prome reunion di Conseho di minister di Reino (RMR) pa aña 2024, posiblemente lo trata e tema di Aruba (Rijkswet pa supervision financiero) y e situacion di e prestamo y e tasa di interes. Posiblemente pasobra oficialmente RMR no ta publica e agenda prome cu e fecha. Pero tras di cortina, e portal aki a compronde cu ta hopi probable cu Aruba lo ta riba agenda. Noticiacla a compronde inoficialmente cu den preparacion pa esaki, awe prome minister Wever lo tin combersacionan cu e secretario di estado Hulandes demisionario Alexandra van Huffelen. Ainda tin e comentarionan cu por corda di ambos mandatario, cu ta 'comenta' riba otro cu e uno quizas no ta domina e tema en cuestion, y e otro ta desmenti cu e lo a declara cierto cos. Hecho ta, cu riba e tema, tin tension, aunke cu publicamente esaki ta wordo desmenti. 

NADA NADA

Manera ta conoci, recientemente e mandatario Hulandes tabata na tanto Corsou como Bonaire pero a skip Aruba, debi cu no tin nada pa papia ariba, ya cu Aruba y Hulanda ainda no a haya otro riba e acuerdonan necesario. Primordialmente e tema di Rijkswet pa supervision financiero. Esaki ta e unico punto ainda pendiente pa Aruba por bin na remarke pa un tasa di interes abou riba e pago di debe di Covid. Prome minister Wever e siman aki a confirma tambe cu ‘ta papiando ainda’ pero cu no a haya otro ainda riba e tema.