Awe merdia mester tin claridad riba protesta di RCA vs Britannia

ORANJESTAD - Pa awe tardi mester tin claridad den mundo di futbol na Aruba, relaciona cu protesta entrega pa un di e ekiponan participando. Arubaanse Voetbal Bond a confirma dialuna cu enberdad SV Britannia a entrega un carta di protesta na oficina di AVB, contra SV RCA, riba e ultimo partido cu e dos partido entre e dos clubnan aki.  

HUNGADOR ILLEGAL

Ta trata di un hungador, cu segun protesta di SV Britannia, SV RCA no a cumpli cu reglamento di AVB, segun articulo 56 y articulo 57 di e Huishoudelijk Reglement di AVB. Mirando cu e protesta aki por tin consecuencia pa cu e continuacion di e partidonan final, dialuna merdia vice-president y secretario general di AVB a pidi pa sinta cu e 4 clubnan miembro, di cual 3 so tawata presente. For di e reunion aki a pidi tanto na SV Estrella como tambe SV RCA pa suministra AVB cu informacionnan necesario di e caso specifico aki. E problema ta trata un hungado cu tawata miembro di sv Estrella y cu awor ta forma parti di sv RCA.

FALTA DOCUMENTO

Te cu ayera tardi 6 or a drenta algun documento di parti tanto SV RCA como SV Estrella. Ta pa e motibo cu a informa tur cuater club di e situacion y a duna SV RCA como SV Estrella e oportunidad te cu diamars 26 di mei 2015, pa no mas tarda cu 2or di atardi pa entrega e documentonan necesario, pa di e forma aki por tin mas claridad. Despues di plaso di tempo aki, miembronan di bestuur lo reuni pa jega na un decision final.

INVESTIGACION

Mes momento tin un investigacion andando den Censo relaciona cu lekmento di informacion. Ta trata specificamente di e caso di protesta di futbol cu ta andando aworaki, entre e ekiponan di britannia y RCA. Informacionnan confidencial di ciudadano lo a wordo saca afo, na Censo cu e proposito aki. NoticiaCla.com a haya confirmacion cu e investigacion ta casi cla y cu e lo wordo manda pa departamento di recurso humano den curso di dia.