Corte a prohibi Gobierno retene full salario di Alan Howell mientras ta investig'e

ORANJESTAD – Corte dialuna a dicta na fabor di ex politico Alan Howell den corte di LAR unda cu Corte a prohibi gobierno pa retene salario completo di Howell, conforme un landsbesluit riba e tema, te ora cu determina desaroyo di su caso unda cu e mester a haya un castigo displinario. Howell a hiba gobierno corte, pasobra den 2022, dado momento cu a cuminsa pone beslag riba su salario debi na un caso andando, gobierno a bay asina leu di   retene full su salario te ora e investigacion contra dje termina. E investigacion ta den e caso penal cu ta tumando lugar pa cual ta acusando Howell di dje, esta entre otro malversacion, falsificacion di firma y forma parti di un organisacion criminal.  

E CASO

Tabata na October di 2022 cu gobierno pa medio di un landsbesluit, a dicidi pa suspende Howell, pendiente e investigacion pa cu un castigo disciplinario cu e lo mester a haya como ambtenaar pa e loke e ta wordo acusa di dje. Ademas a dicidi cu lo retene 1/3 parti di su salario pa 6 siman y despues a pasa pa suspende pago di full su salario te ora cu dicidi riba e medida discplinario. Ta riba e punto ultimo aki, cu Howell a dicidi cu ta demanda gobierno y pa restablece e pago di su salario bek, aunke cu tabata kitando 1/3 parti. 

DECISION DI CORTE

Corte a mustra cu mientras cu Howell a bringa tambe e parti di retencion di 1/3 parti di su salario durante e investigacion, esaki si e no ta haya rason, pues aki Corte tabata den desacuerdo cu ne. Sinembargo, pa loke ta e parti cu gobierno a opta pa retene full e salario, si Corte ta mustra cu ta gobierno a faya den e decision aki. Esey ta pasobra ,entre otro, Corte ta bisa cu gobierno no a calcula e impacto di Howell su otro entradanan cu e tin pa cubri su su debenan cu e tin awor cu e ta perdiendo parti of salario completo. Entre otro, segun Corte, gobierno no a haci un calculacion completo di cuanto Howell su otro entradanan ta genera (via p.e. su casa su negoshi) y cuanto gasto mensual Howell tin cu e tin cu cumpli cu ne. Y como tal mester por spera di gobierno cu a base di esaki, e por haci un evaluacion di interes, locual no a sosode. Y pa e motibo ey, e decision di gobierno pa retene full e salario di Howell, no tin pia pa para ariba y a destrui e decision ey. Esey ta nifica tambe cu despues di e 6 siman cu a retene 1/3 di e salario, e mesun regla ta sigui. Pues, cu envez cu ta kita full e salario di Howell, e ta sigui haya e salario paga atrobe kitando 1/3 parti di e salario. Por lesa e sentencia completo AKI.