Na St Maarten awe e político Theo Heyliger tin di meld na prizon pa sinta su castigo

PHILIPSBURG - Un dje lidernan polítiko grandi ku e isla di St. Maarten a konosé, Theo Heyliger (53) a haña yamada di Ministerio Públiko pa presentá awe djaluna na prisòn na Point Blanche p’asina sinta e kastigu di 5 aña ku el a haña pa labamentu di plaka i soborno. Djabièrnè último Heyliger a haña e notifikashon aki. E lo keda mas òf ménos 2 aña i mei den prisòn.

Den luna di mei 2020 korte di promé instansia a haña Heyliger i kuater otro ko-akusado kulpabel den dos kaso ku ta karga e nòmbernan “Larimar i Catfish”. E kaso aki ta trata di soborno ku tin konekshon ku vários kompania di konstrukshon pa vários proyekto riba e isla di St. Maarten i tambe labamentu di plaka. Korte a haña proba ku Heyliger a tuma un total di US $3.36 mion serka kompania di konstrukshon Windward Roads BV, kompania industrial Central Concrete Mix, Devcon TCI Ltd., i un kompania ulandes Volker Construction International BV. Esaki a sosodé tempu ku Heyliger tabata Diputado, Miembro di parlamento i tambe minister enkargá ku kas, infrastruktura i desaroyo (VROMI). Pa motibu di esaki, fiskal a kuminsá un kaso di konfiskashon/ekspropiá kontra Heyliger, aparte di e kastigu di 5 aña ku el a risibí den korte.

Den luna di òktober 2023, ministerio Públiko a anunsiá ku nan i Heyliger a yega na un akuerdo den e kaso di konfiskashon. E akuerdo ta inkluí un pago di un suma di US $5 mion na ministerio públiko i Heyliger ta retirá tur su derecho i tambe entradanan di hür di diferente propiedatnan inmóbil. Ku esaki, Heyliger ta renunsiá na aktividatnan ku el a optené di forma ilegalmente. E suma lo benefisiá Fondo di Kriminalidat. Optando pa un akuerdo di konfiskashon ta evitá prolongashon di prosedimentu den tribunal di ámbos parti. E kaso di konfiskashon ta keda será ku yegada di e akuerdo aki i ámbos parti lo pidi Korte di Promé Instansia pa deklará kaso será riba 1 di novèmber. Pues awe, djis despues di elekshon Heyliger tin di bai prisòn. Su kasá ta number 2 riba partido Democrat di St. Maarten i ta un dje polítikonan ku a kue bastante voto. NOTA: E texto ta scirbi den Papiamento fonetico di Corsou.