Gobierno a pone 6.7 miyon pa traha edificio nobo pa Juliana School Mavo

ORANJESTAD - Gobierno a pone 6.7 miyon pa traha edificio nobo pa Juliana School Mavo. Tabata durante conferencia di prensa di Gobierno di Aruba diahuebs ultimo, cu minister di Enseñansa Endy Croes a duna algun avance di e proyecto di renobacion di Juliana School Mavo. Desde aña 2016, e team di Juliana School a muda pa otro edificio temporalmente, pa motibo cu e scol no tabata den un bon condicion. Aki e mandatario a recorda cu gobierno di Aruba a stipula 6.7 miyon florin pa construi un edificio completamente nobo. Durante e Presupuesto Supletorio 2023, Minister Endy Croes a propone pa construi e scol nobo aki den e bario di Paradera. E cifranan di Central Bureau of Statistics (CBS) ta indica cu Paradera actualmente tin e porcentahe di mas halto na Aruba di mucha y/of hoben di e edad entre 0 pa 17 aña. Durante conferencia di prensa, e mandatario di Enseñansa a indica cu ta di lamenta cu e parlamentarionan di oposicion a vota contra un scol secundario na Paradera. Danki na cualicion cu a vota pro, a aproba e propuesta pa construi Juliana School den e bario di Paradera.  A forma un team mesora den e luna di december pa e proyecto aki. A haci un “site-visit” riba e tereno y otro siman lo tin e prome sket di e scol aloca riba e tereno. Ta planifica pa inicia cu e trabou di construccion na mei 2024.