Polis a detene 7 persona cu droga y placa

ORANJESTAD - "Ta trata aki di un investigacion grandi, encabesa pa nos Departamento di Crimen Organisa, pero cu cooperacion di varios otro ekiponan mas", asina Lito Lacle, Vocero di Cuerpo Policial Aruba a indica. Ta referi na un investigacion grandi andando, den cual a detene no menos di 7 sospechoso durante dia awe dialuna. "Nos no por bay den detaye di e sospechosonan, pero mi por bisa si cu ta trata aki di 7 persona di diferente nacionalidad", di acuerdo cu Lito Lacle. Banda di detencionnan, Polis a logra haya un cantidad considerabel di droga. A tuma tur e droga den beslag pa mas investigacion. Banda di droga, Polis a haya un cantidad considerabel di placa, cu tambe a tuma den beslag. Polis ta sospecha cu e droga y placa tin di haber cu otro y ta parti di e caso grandi cu awor ta bao di investigacion. "Mi no por descarta cu lo por tin mas detencion ainda", segun Lito Lacle a vocifera. Cuerpo Policial Aruba ta conoci como un di e miho organisacionnan policial den nos region. Tanto pa su conocemento, ekiponan na nan disposicion y na e porcentahe halto di casonan criminal cu ta soluciona anualmente. E cifranan aki ta midi integridad di un organisacion policial. Esaki mes ta e motibo tambe cu hopi otro Cuerponan di Polis den nos region, ta traha gustosamente cu Cuerpo Policial Aruba, ora ta trata casonan criminal cu ta crusa frontera. Cuerpo Policial Aruba ta traha den cooperacion estrecho cu Cuerponan di Polis den Reino Hulandes manera Korps Politie Rotterdam Rijnmond, KLPD y RST, sin lubida otro partnernan internacional manera Interpol, DEA, FBI, RCMP, Force Protection Agency, ACCP y IACP.