Malcontento a pone 5 banda keda sin inscribi pa Festival di Tumba

ORANJESTAD – Riba e anochi di inscripcion di Festival di Tumba pa carnaval 70, representantenan di un total di 5 banda a anuncia diaranson anochi cu nan no ta participa mas na e mas. Ta trata di e bandanan Buleria, DLS, Suona, Shine Music y 1 Oak di Jurick Salomon. Nan a anuncia cu awe diahuebs mainta lo tene un conferencia di prensa pa splica e motibo. Noticiacla a compronde cu tin un descontento entre varios banda pa e forma con cos lo ta bayendo pa cu e festival. 

ROCCO FRANKEN

Adelantando e conferencia, e integrante di Buleria a duna un comentario awe mainta riba e tema. “Tur hende cu conocemi bon sa cuanto mi ta stima Tumba” e ta cuminsa na splica. “Y tur hende cu a puntrami durante di e aña a haya e mesun contesta. "Carnaval 70 mi lo competi na Aruba” Franken ta sigui bisa. “E ta duel mi hopi cu cosnan mester bai asina. Pero Aruba merece mihor. Nos musiconan merece mihor y e pueblo merece mihor. 

Awe 11or nos lo tin un rueda di prensa pa splica e motibonan pakiko a tuma e desicion aki” e la finalisa su comentario. 

INSCRIPCION

Mientrastanto inscripcion a tuma lugar asina mes unda cu varios persona a inscribi no obstante e asunto aki. Pero ainda noticiacla no a logra haya e resultado di e inscripcion aki. NOTA: E potret acompañando e articulo aki ta di archivo di Noticiacla.