KPA: Detencionan a cay pa cu Tik Tok challenge di horta autonan marca KIA

ORANJESTAD – Polis a raporta diaranson mainta cu detencion a cay pa cu e Tik Tok Challenge di horta autonan marca KIA. Segun e informacion, den ultimo luna Cuerpo Policial Aruba ta constata cu tin basta hortamento of intento pa horta autonan specialmente marca KIA modelo Rio. KPA a tuma nota tambe cu malechornan ta purba di horta e KIA modelo Sportage como tambe KIA modelo Picanto purbando e mesun Modus Operandi. 

Esaki ta un fenomeno cu a cuminsa na Aruba ora grupo di hobennan a cuminsa haci e “TikTok challenge”.

E MODUS OPERANDI

Door di uza un usb cable charger di telefoon nan ta start e auto encuestion. E sospechoso ta graba su mes haciendo e acto aki pa despues post e riba TikTok. 

Ta asina cu departamento di Team Motorvoertuigen Criminaliteit (TMC ) kier concientisa esnan cu tin e auto menciona pa pone mas atencion y precaucion pa evita cu e auto ta wordo horta. Doñonan di e autonan por preveni door di pone alarma of tambe stuurklem. 

Te cu awo e Team a detene por lo menos 10 sospechoso relaciona cu e casonan di joyriding di autonan Kia modelo Rio. E edad di persona deteni ta cuminsa for di 14 aña pa 21 aña. 

Polis tin atencion pa cu e fenomeno aki y ta avisa pa tur persona cu tin pensa di haci esaki, cu bo chens ta grandi di wordo gara y deteni como consecuencia cu bo lo hayabo ta bay cera. Corda esaki ta un delito y tin castigo riba dje . 

Mayornan di e sospechosonan menor di edad mester corda cu nan ta por wordo pone responsabel pa e gastonan di e daño haci na e auto como tambe daño na tercero. 

Mayornan papia cu boso yiunan y splicanan e consecuencia cu e “ Tik tok challenge” tin. No ta solamente e yuinan ta bay cera pero pero cu abo como mayor ta wordo poni responsabel pa tur gasto envolvi!