Parti caribense den Reino instrumental den fomento di comercio cu America Latino

ORANJESTAD - Mas y mas Aruba, Bonaire y Corsou ta haci nan esfuerso pa realisa un funcion di coredor of hub den e comercio entre Europa y America Latino. For di Hulanda nos ta mira durante ultimo añanan un intensificacion di e intentonan pa haci mas negoshi cu, entre otro, e economia nan cu ta lanta cabes manera na America Latino.

Pa haya un bista den e experencianan y den e necesidadnan di sector comercial riba tereno di desaroyo comercial, Ministerio di Asuntonan Interior y Relacionnan di Reino, den sincronisacion cu Ministerionan di Asuntonan Economico y Relacionnan Exterior, oficina di investigacion Stichting Economisch Onderzoek (Fundacion Investigacion Economico), a duna orden , pa haci investigacion tocante esaki. Esaki ta conecta mesora cu e deseo cu Minister di Relacionnan Exterior Koenders a expresa durante su estadia den region na cuminsamento di e luna aki, pa tin mas bista riba e interesnan di e partinan Caribense di Reino ora di diplomacia economico.

E investigacion ta aspira, for di perspectiva di experiencia- y necesidadnan di empresanan riba e islanan y na Hulanda, pa duna un contribucion na e discusion riba e pasonan cu mester sigui y tambe riba e medidanan di maneho cu mester tuma cu ta dirigi riba demas desaroyo di comercio di Reino cu America Latino. Pa logra esey a ehecuta un encuesta di web (webenque?te) bou di comercio na Hulanda, Aruba, Corsou, Bonaire y Sint Maarten. Durante e dianan tras di lomba e investigadornan, hunto cu representantenan di Asuntonan Exterior y Relacionnan di Reino y Asuntonan Economico, a haci un bishita na e islanan abou pa discuti resultadonan di e investigacion aki.

Durante e bishita aki encuentronan extenso a tuma luga cu (representantenan di) sector comercial, politiconan y tambe empleadonan publico. Banda di un splicacion y aclaracion riba e resultadonan, a solicita explicitamente tocante e posibilidadnan cu nan ta mira pa fomenta e actividad/diligencia economico denter di Reino y cu America Latino. Tambe a papia riba e obstaculonan cu empresarionan ta experencia den nan negoshi cu America Latino y e experencianan di sector comercial cu facilidadnan disponibel cu tin mester pa nan, tal manera aeropuerto, haf, duana y e-zone.

Resultadonan di e investigacion aki ta confirma cu e parti Caribense di Reino por hunga un papel den fomento di comercio cu America Latino. Negoshinan Hulandes cu ta haci negoshi cu America Latino, y cu ta desea di expande e negoshi ey, ya caba ta haci uzo di e facilidadnan y e servicionan den e parti Caribense di Reino, of cu nan ta considera pa bay haci esey.