Aruba entre e 4 destinacionan di beach mas popular pa Merca e winter aki

MIAMI – Aruba ta entre e 4 destinacionan di beach mas popular pa Merca, e winter aki. Asina e portal traveloffpath.com ta sigura dialuna riba nan portal. Segun e portal, ta oficial cu winter a cubri gran parti di Nort American cu frieldad y sneeuw, y biahero Mericano ta buscando un excusa pa biaha pa un destinacion cu tempo calor. E portal ta raporta cu e cuater lugarnan ta mirando crecemento di dos cifra den termino di bishitante y esaki lo bira mas grandi den Februari tambe. E biaha aki, a scohe Noord, osea Palm Beach como un di e 4 lugarnan, unda cu esaki a mira 105% di crecemento e winter aki. Loke segun e portal, ta separa Aruba di e otronan, ta cu ta e hecho cu hasta esnan cu no kier a pasa full nan dia na laman, por haya algo pa disfruta, manera e mercado di turista riba e strip.