Dushi Carnival Group a clarifica cu nan tabatin tur documento necesario na ordo diasabra

ORANJESTAD – Dushi Carnival Group (DCG) ta lamenta cu SMAC, sin informa cu lider di grupo di DCG prome, a dicidi di expresa cu DCG no tin niun papel na ordo, como sifuera cu ta DUSHI ta esun cu a causa e tardansa diasabra durante parada di Fakkel, mientras cu den otro gruponan tambe e mesun problema aki a surgi.Asina e grupo a informa dialuna atardi via un comunicado. “ E pruebanan publica ta demostra cu DCG su trailer y bar ta conta cu e keuringnan necesario. DCG ta cumpli cu reglanan” .

DCG A PRESENTA PRUEBA 

“ Djis pa informa nos participantenan, e pruebanan publica ta pa boso sa cu nos como Dushi Carnival Group a cumpli cu tur exigencia” e comunicado ta sigui bisa. “ Nos trailer como tambe nos bar a cumpli cu tur rekisito pa garantisa siguridad di nos participantenan pa cual motibo a haya e keuring tambe pa por subi caminda. Pues locual cu a pasa tabata fuera di nos alcanse. Esey ta e motibo di e tardansa. Pero asina mes di tur skina a yega ayudo. Pa esaki nos ta sumamente agradecido” e grupo ta sigui bisa.

TREMENDO AMBIENTE 

A pesar di tur contratiempo, DUSHI a bisa di a sa di pone un tremendo ambiente riba caminda. DUSHI a luci totalmente cu su outfit colorido cu un biaha mas a haci un diferencia durante anochi. “ Nos kier gradici nos DUSHI people pa nan pasenshi pa e tardansa cu a surgi. Boso pasenshi, animo y energia a haci cu, a pesar di tur cos, nos tabata sa di pone un dushi ambiente riba caminda. Ta pa boso nos ta hacie”. Segun DCG cu esaki nan kier bisa si cu DCG ta asumi su responsabilidad y lo percura pa esaki no ripiti.