Simar: Na ningun momento a nenga di yuda Juf. Suky

ORANJESTAD – Ningun momento sindicato di maestro Simar a nenga di yuda juffrouw Suhail ‘Suky’ Croes. Segun e sindicato, nan a haya ta bon pa clarifica e informacion aki, debi cu supuestamente keto bay diferente medio di comunicacion ta publica informacion sin atende cu doño di curpa prome, ya cu e informacion aki por ta incorecto y por afecta esnan concerni na manera negativo. Segun e sindicato. “specialmente media, “reportero” y locutornan cu ta liga na partidonan politico, cu ta traha na nivel hopi in profesional ofendiendo Simar y su representantenan sin acerca nan na ningun momento pa informacion concreto. Sin laga afo algun politico cu ta uza casonan manera esun di Sra. Croes pa hunga politica di nivel abou. Esaki ta causa cu Simar mester duna su banda di medaya, sacando informacion cu preferiblemente lo a keda den cas.

ASERCACION SUKY CROES

Segun e sindicato, sra. Suky Croes a acerca directiva di Simar pa sosten y conseho pa cu su caso. Na e momento ey e no tabata miembro di Simar. Asina mes, mirando e gravedad di e caso, directiva a habri porta pa su persona y su coleganan, cu mayoria no tabata miembro na e momento ey. Sra. Croes a ser ricibi pa presidente, Sra. Sheia Lazo-Tromp kende na su turno a informa directiva inmediatamente di e situacion. Directiva a aproba pa atende Sra. Croes un bes. Segun e sindicato, inmediatamente a percura pa consehero huridico y abogado di Simar tuma e pasonan necesario.

DPS

Directiva a tuma contacto cu director di DPS pa informacion, a sinta cu Minister Hooyboer-Winklaar pa trata e caso y a reuni cu abogado David Kock pa papia tocante e siguiente pasonan. Abogado di Simar a cuminsa cu e caso entamando un “kortgeding” y un “bodemprocedure”.      E meta principal di e “kortgeding” tabata pa anula e decision cu e director di DPS a tuma den nomber di Minister Hooyboer, cual tabata e suspencion di Sra. Croes y pa lag’e bay traha bek. Consecuentemente Minister Hooyboer, pa medio di su abogado, ta informa cu Minister ta hala atras su decision di suspencion y cu Sra. Croes ta ser permiti pa bay traha bek. Esaki pues ta haci cu logicamente no mester a ser trata dilanti un huez.

NO A HALA ATRAS

Siguientemente Simar pa medio di su abogado tabata pendiente di e “bodemprocedure” cu lo a trata entre otro e procedura tuma pa DPS/Minister, e keho contra Sra. Croes, e investigacion riba su mes, Ta procedura normal riba nivel hudicial. Pues no ta asina cu Simar y abogado Kock a “hala caso atras” ni a laga di duna e atencion debido na e caso. Foto ta archivo di un conferencia di prensa di Simar.