Hopi keho pa tiramento di klapchi hasta despues di Tres Rey

ORANJESTAD – For di siman pasa pero mas ainda e fin di siman cu a pasa, tabatin hopi ciudadano disgusta cu e hecho cu tabatin tiramento di klapchi, ainda despues di 1 di januari, siendo cu ley ta stipula claramente cu ultimo rato pa tira klapchi, ta 1 di januari pa 1’or di merdia. Despues esaki ta bira castigabel cu multa como infraccion. Esaki aparentemente no a wordo comprendi y of respeta y a sigui tira klapchi manera cu ‘mundo ta caba’. Ademas riba rednan social tabata ‘defende’ e acto aki cu ‘esaki ta tradicion cu ta sigui te dia tres rey’ esta 6 di januari. Tabata te hasta un mandatario cu aña pasa ora cu a ‘gare’ ta tira klapchi despues di tempo, tambe lo a bisa cu ta tradicion cu ta tira te 6 di januari. 

PASA LIMITEHopi ciudadano cu tabata indigna pa e hecho cu a sigui tira klapchi, tabata principalmente rabia pa e daño y efecto cu esaki tabatin pa nan mascotanan, principalmente cacho. Siman pasa ainda, Noticiacla a reproduci un informacion di un post di Facebook di Lost & Found Dogs, unda cu a bisa cu den apenas un siman (7 dia) a perde mas di 200 cacho, cu lo a scapa of core bay di spanto di klapchi. Di esaki mitar lo a wordo haya bek, mientras cu e resto tabata ‘perdi’ ainda. E grupo aki tabata hopi indigna cu e tiramento ‘extra’ aki, y cu mas ainda, no tabata haci nada contra e infraccion aki di parti di autoridad policial. ‘Pakico tin ley, si no ta enforsa esaki’ tabata un di e comentarionan cu mas a resalta. Otronan cu tabata critica esnan cu tabatin problema cu e tiramento ‘extra’ di klapchi, tabata bisa cu mester djis ‘deal cune’ y cu si bo tin cacho, bo mester percura pa train esaki y of tuma precaucion contra e klapchi, y cla. Pero aki hopi no ta compronde cu esaki ta mas facil bisa, cu haci. No tur hende cu tin cacho, tin e forma pa entrena nan cacho of tuma extra precaucion pa cuida nan cacho durante e tiramento di klapchi. Ta conoci cu tin forma pa ‘maneha esaki’ pa e 4 dianan di tiramento, cu pilder contra stress, thunder shirts pa e cacho, of tuma medida otro manera hinca e cacho paden di cas. Pero despues di e fecha, cos ta cambia ya cu e ta bira algo illegal. Y aki ta unda cu e ‘rabo ta krul’. 

TRES REY

Loke hopi cu a comenta, a cuestiona pakico ta usa e excusa di Tres Rey cu mester tira klapchi te cu e fecha ey, pasobra ta ‘tradicion y cultura’, puntrando kico Tres Rey tin di haber cu klapchi, y di unda e ‘cultura’ aki a sali. Ademas, tin un ley cu ta stipula no solamente e fecha di limite pero hasta e orario. Y asina mes, hende no ta cumpliendo cu e ley aki. 

PROHIBICIONA cuminsa cu e grito den direccion di cu si no por cumpli cu e regla di tiramento di klapchi, e ora mester cuminsa pensa riba e accion pa elimina e tiramento di klapchi completamente, pa manda un mensahe pa esnan cu ta tira klapchi despues di e fecha stipula y pa mas importante, manda un mensahe na comunidad completo cu no ta tolera falta di regla y anarchia riba un pais culto manera Aruba ta conoci di ta. 

CONTROL

Un di e kehonan cu tambe a tende ta cu ta dificil pa polis controla ken tur ta tira klapchi despues di e fecha y cu hopi biaha pa ora cu nan yega, ya caba e tiramento di klapchi a para. Hopi tambe tin e dilemma di no kier ‘keha’ riba nan bisiña, pasobra esaki ta crea un ‘enemistad’ pa resto di e aña, cu ta algo cu nan no kier. E ta bira algo dificil, ya cu ta permiti benta di klapchi y tiramento di klapchi, pero cu esaki ta pasa su limite. Ta bisa tambe cu polis tin ‘miho cos pa haci’ cu sinta check tur caminda ‘ken ta tira klapchi ilegalmente’. Noticiacla a tuma contacto cu polis pa haya un bista di nan banda riba e tema, pero ainda esaki no ta conoci.