Panel di avion di Alaska Airlines cu a ‘bula bay’ a wordo haya den cura di un docente na Portland

PORTLAND – Investigadornan Mericano a haya e parti di e avion di Alaska Airlines cu a bula bay diabierna, den cura di un docente den ciudad di Portland, estado Oregon. Ta trata di e panel cu a bula bay durante pleno buelo di e avion. E avion mester a haci un aterisahe di emergencia cu danki Dios a bay bon y cu no tabatin mas daño of desastre. Esaki pasobra e avion ainda tabata bulando riba un nivel basta abou, y no a yega e haltora necesario. Si esaki a sosode ora cu e avion a yega su haltura regular, e resultado di e accidente por tabata hopi desastroso. Ta trata di un avion Boeing 737 tipo 9. Ora cu e incidente a tuma lugar, e departamento federal Mericano di aviacion FAA a ‘ground’ tur avion di e tipo ey temporalmente. 

E PANEL

Pa loke ta e panel, tabata diadomingo cu e docente en cuestion a ripara cu e panel tabata ‘tira’ den su cura patras. E panel por duna indicacion kico lo a bay robez cu e buelo. E avion tabata na caminda di Portland pa un aeropuerto na Los Angeles. E avion a aterisa sigur cu 171 pasahero y 6 tripulande. Ningun hende tabata herida.