SMAC: Mayoria di grupo den parada di flambeu no tabatin niun documento na ordo!

ORANJESTAD – Mientras cu e Parada di Flambeu a sali netchi na ora, esaki un rato despues a conoce un retraso di por lo menos 45 minuut, ora cu a resulta cu mayoria grupo cu a participa, no tabatin ningun documento di transporte den ordo. SMAC mes a saca un comunicado diasabra anochi, confirmando esaki. “ Ta di lamenta cu AWE,  riba dia di Parada di Flambeu MAYORIA grupo no tin NIUN documento den ordo” tabata e mensahe textual di SMAC. A bisa cu nan tabatin reunion cu tur stakeholders, tur lidernan di grupo, doñonan di compania di zonido, luz, tracker, chauffeurnan, gobierno foi aña pasa pa sigura cu tur cos ta na ordo cu e papelnan. “ Pa ta exacto 18 di december, presidente di SMAC, sr. Darren van Ommeren a manda pa porfabor bay keur tur e vehiculonan”. Pero casi niun a duna oido, cu consecuencia cu e participantenan tabata esnan cu a sali perdi cu mester a warda basta prome cu e parada mes por a sali. 

SCHEDULE DI POLIS

Polis su schedule cu esaki tambe a bruha full, unda cu por a nota cu tabatin un retraso di casi 45 minuut si no ta mas, si compara unda e cabez mester tabata segun e schedule. P.e. segun e schedule pa 8:45 e cabez mester tabata na George Madurostraat. Pero pa 9or y mei, e cabez no a ni yega e caya ey. Noticiacla tabata testigo di esaki, y ta confirma cu esaki a bruha e schedule di polis completamente.  

SMAC

“Nos ta informa si cu SMAC ta haciendo tur cos posibel pa Aruba completo por disfruta di su parada di flambeu. Aruba, ban disfruta carnaval sanamente” e comunicado di SMAC a bisa, indicando cu nan tabata purba pa aunke tabatin e problemanan menciona, e parada por a sigui di un forma of otro. NOTA: E potretnan tabata di e prome grupo cu a sali y ta solamente pa ilustracion y no necesariamente ta esnan cu tabatin problema cu documentacion.