Topiconan ‘cayente’ den reunion tripartite na Hulanda awe

DEN HAAG – Awe mainta trempran reunionnan tripartite entre Aruba, Corsou y St Maarten a cuminsa, y lo tin un duracion di 1 dia y mei. Despues di esaki, lo cuminsa cu e reunionnan IPKO (Interparlementare Koninkrijks Overleg) diaranson proximo. Un serie di topico lo keda presenta y trata cu ta varia di ‘posibilidadnan economico’, te na screening di candidatonan pa minister’. Tur ta topiconan cu a wordo trata na inicio di e aña aki caba na Aruba.

AGENDA MAINTA

E parti mainta, e topiconan lo ta mas ‘general’, unda cu lo toca entre otro terugkoppeling economische kansen in het Koninkrijk,terugkoppeling energie, terugkoppeling onderwijs, terugkoppeling integriteit van bestuur, terugkoppeling gezondheidszorg, terugkoppeling jeugd en jongeren, y finalmente, terugkoppeling discriminatie.

TOPICONAN CAYENTE

E parti merdia sigur lo hala hopi atencion, mirando e temanan, cu ta mas ‘hot’, sigur pa Aruba y St Maarten. Ta trata di e uso di articulonan 15 y 21 di e reglamento di gobernador door di conseho di minister di Reino. Algo cu a toca Aruba aña pasa y a alga un sabor amargo atras pa gobierno di Aruba y tambe parlamento. Den e caso aki a busca sosten di Corsou y St Maarten y a haya esaki tambe.

ST MAARTEN

E otro topico, tambe ta uno interesante cu ta mas bien toca St Maarten, esta e screening pa candidatonan pa minister, pa medio di un criteria y normanan comun. Esaki a toca e isla menciona, y a haya sosten di tanto Corsou como Aruba.

GESCHILLENREGELING

E siguiente dia, lo tin e topico cu Aruba su fraccion mayoritario, esta AVP a bin ta bringa pe hopi, cu ta e asina yama geschillenregeling. Un instancia cu tin cu independientemente determina e curso di caminda ora cu tin disputa entre dos pais den Reino. Despues cu Aruba a haya su mes den un situacion asina aña pasa, e aña aki ta trata Corsou, cu tambe tin un situacion den parlamento, ora cu e.o. tabatin problema ora cu presidente di parlamento a saca un parlamentario for di e reunion. E reunion lo toca tambe e asina yama traficacion liber di producto y servicio, investigacion di nacionalidad, apelacion den casonan di impuesto, registro di testament, y e relacion di SIDS (Small Island Developing States) pa cu e maneho di desaroyo actual cu ta wordo aplica den Reino Hulandes. E topiconan aki lo wordo trata den e dos dianan cu ta bin. Riba e foto por mira parti di delegacion di Aruba, miembronan di AVP y MEP.