"AWA: e Amigo di Bo Curpa"

(ADVERTORIAL)

Bon bini bek na nos editorial! Ami ta Dasha y mi ta un boticario na Botica di Servicio. Na prome lugar, un feliz aña 2024 pa henter Aruba! E dianan di fiesta a pasa, a disfruta di e ham y e ayaca y awor carnaval ta na porta. Nos tur tin nos metanan nos dilanti pa 2024, pero tin un meta sigur cu no por falta pa por yega na un curpa mas saludabel e aña aki. Awe nos ta bai papia di e amigo di bo curpa cu ta…awa!

E HEROE ANONIMO

Awa - e ta e heroe anonimo di nos salud. Den tur e papia di plan di dieta y consehonan di bienestar, su importancia hopi biaha ta keda atras. Pero laga nos tuma un momento pa celebra e elemento aki simpel pero increiblemente vital pa nos salud.

Nos curpa ta consisti di 60% di awa y esaki no ta un coincidencia. Awa ta hunga un rol prominente den casi tur funcion di nos curpa. E ta yuda regula temperatura, yuda den digestion y ta yuda pa entrega nutrientenan den henter e curpa. Na su esencia, e ta e likido supremo pa sosten di bida. Sinembargo, hopi di nos no ta duna nos curpa e awa cu e mester. Schedule druk, distraccion, of simplemente lubida pa bebe awa aki ta hiba na deshidratacion. 

Y e efectonan? Nan no ta solamente relaciona cu sed.

Ora nos ta deshidrata, nos nivel di energia ta baha, nos concentracion ta baha y e dolor di cabes molestoso ta aparece. Ta e manera di nos curpa pa mustra cu e tin mester di mas awa.

SU SIMPLICIDAD

E bunita di awa ta den su simplicidad. E ta den su naturaleza un bebida di cero caloria y sin sucu. Sin etiketanan luhoso, sin aditivonan, pero refrescante. Y e parti mas mihor? E awa di Aruba ta un di esunan mas miho di mundo, e ta cumpli cu e standardnan mas halto di World Health Organization. 

Pero, cuanto awa ta suficiente? Aunke e regla di "ocho glas pa dia" ta un bon punto di salida, nos necesidadnan individual ta varia. Ta depende di factornan manera nivel di actividad y salud personal.

Pero aki tin e secreto: Siña con pa tende di bo curpa ora cu e mester di awa. Sed ta e manera di bo curpa pa bisa, "Hey, mi tin mester di awa!" No lubid’é. Tene un boter di awa na man semper y bebe esaki durante e dia. Un tip: marca orario nan riba e boter of pone un alarma asina pa bo corda cada ora pa bebe un tiki. Ta un habito chikito cu tin beneficionan grandi.

Awor cu tur hende ta preparando pa e temporada di carnaval, cuminsa awe mes cu e custumber di bebe mas awa. No ta solamente tocante kita sed; ta trata di sostene nos salud den un manera cu ta bai mas leu cu loke nos por mira. 

Laga nos “cheers” na awa – e amigo di nos curpa. Asina ta, tuma un slok!