Sentencia pa dr Narain ta cay e siman aki

ORANJESTAD – E siman aki ginecologo dr Narain ta haya su sentencia di Corte, y wak si e por continua cu su trabounan na hospital algun dia mas. Dia 27 di mei proximo hues ta dicta e sentencia final, mientras cu for di dia cu a trata e caso dos siman pasa, huez a ordena hospital Horacio Oduber, pa laga e ginecologo drenta hospital y lagu’e traha normal. E contracto di Narain ta vence dia 1 di juni, pues ta cuestion di laga e ginecologo traha algo dia solamente mas , si e gana su caso cu e sentencia final. Posiblemente por duna e ginecologo un caminda di cana, pa e dianan cu e no por a traha, y consecuentemente perde pa gana placa.

E CASO

E ginecologo a hiba hospital Corte, despues cu e la haya prohibicion di entrada na hospital ora cu su contracto a vence pa motibo di su edad. No obstante esaki, AZV e tempo ey a dicidi di prolonga su contracto te dia 1 di juni, pendiente un reemplazo pa e ginecologo. Pero pa sorpresa di e ginecologo (y AZV), hospital a dicidi otro.

SENTENCIA TEMPORAL

E ginecologo dr Harold Narain por drenta hospital atrobe, aunke pa un periodo temporal. Esaki hues a dicta dia 8 di mei ultimo pendiente un sentencia fiho dia 27 di mei proximo. Mientrastanto AZV a tuma nota di e decision temporal di e huez den e kort geding tocante acceso den hospital entama door di dokter H. Narain contra Horacio Oduber Hospital.

AZV

AZV ta sali for di punto di bista cu e pashentnan di dr. H. Narain por lo pronto por wordo yuda segun un planificacion nobo cu mester wordo haci. Por tuma contacto cu dokter H. Narain en conexion cu e planificacion di e operacionnan y of otro tratamento (parto) den hospital.

CASO

Tabata dos dia prome cu a bira conoci cu diabierna lo tabatin un kort geding den corte cu e ginecologo dr Narain a entama contra hospital, pa cu prohibicion di su entrada eynan. Despues di e caso, huez lo a dicta ken tin razon. Segun directiva di AZV,  nan a papia cu un grupo di hende muhe preocupa tocante e situacion actual cu ginecologo Narain.

KICO A PASA NARAIN

Manera ta conoci, AZV a prolonga dr Narain su contract te 1 di juni, ora su reemplazante cuminsa. Pero door cu dr Narain no mag di drenta hospital mas, e no por haci operacion. E causa pakico Hospital no kier prolonga dr Narain su toelatingsovereenkomst, segun AZV, ta un asunto entre dr Narain y Hospital.

PASHENTNAN PREOCUPA

A compronde cu tanten, e pashentnan di dr Narain ta preocupa y ta puntra nan mes kico lo pasa ora hende muhe cu ta na estado mester wordo opera. AZV a compronde di hospital cu tin tres ginecologo na hospital cu ta disponibel pa casonan urgente.