Na Corsou, rapport forensico riba Aqualectra a carga aprobacion di Minister Cijntje

WILLEMSTAD - Ofisialmente ayera Minister di Desaroyo Ekonómiko, sr. Ruisandro Cijntje, a emití un karta den kual e ta fiha su posishon pa ku e desaroyonan na Aqualectra, partikularmente e karta di retiro ku el a risibí di tres miembro dje hunta di komisario. Den su reakshon e minister ta bisa ku el a tuma nota ku sierto dokumentonan konfidensial i di karakter tékniko relashoná ku e kompania Aqualectra ya ta den publisidat, apénas dos dia despues ku aña a habri. Esaki ta di lamentá ya ku esnan ku ta wòrdu nombra den un Hunta di Komisario (RvC) sigur mester protehá interes di e kompania den kual nan ta wòrdu nombra. o. 

Djabièrnè dia 29 di desèmber 2023, atardi lat e rapòrt forénsiko a wòrdu di meil pa gerensia di Aqualectra i el a risibí kopia di e mail aki.  Natural den un fin di siman di kambio di aña, ta imposibel pa Gobièrnu (AVA) òf e komo representante di akshonista haña oportunidat di tuma nota di e kontenido, te pa e studi’é i diskutié ku tantu esnan enkargá ku e operashon i servisio di e kompania Aqualectra òf ku komo e Instansia ku a traha e rapòrt.

Segun Cijntje, e ta lamentá e manera ku e proseso aki a kana. Den publisidat ta aparentá komo sifuera e retiro di e tres miembronan di Hunta di Komisario a tuma lugá, komo “donderslag bij heldere hemel”. For di 30 novèmber 2023 e Presidente Komisario a informá si ku entrante 1e  di yanüari 2024 e ta tuma retiro, ya ku e tin otro enkargo den un institushon finansiero. Inmediatamente a tuma e medidanan nesesario pa inisiá e proseso pa nombra un Presidente Komisario nobo pa asina salbaguardiá interes di nos kompania Aqualectra. Dia  27 di desèmber último, despues di vários luna, porfin e rapòrt forénsiko a keda kla, dia 29 di desèmber e dos otro miembronan di e RvC di Aqualectra ta tuma nan retiro. Segun e minister, e no sa si tin un konekshon entre e dos susesonan aki. Aktualmente a keda un miembro den e RvC di Aqualectra i e proseso pa nombra e Presidente Komisario ya ta kanando. Tin un kandidato pasando e proseso legal. Banda di esaki Gobièrnu a inisiá e prosedura pa yena e sobra vakaturanan inkluyendo esnan ku dia 1e di yanüari 2024 a bira konosí formalmente. Pa loke ta e rapòrt forénsiko, e  ke enfatisá ku ta riba su proposishon i insistensia tantu RvC komo BTP a kuminsá ku e investigashonnan aki. Pues el a sostené kompletamente ku e investigashonnan aki ta tuma lugá pa tin klaridat riba asuntunan interno di e kompania. Awor mester analisá e resultado di rapòrt pa por fiha e kompas pa futuro di Aqualectra, na bienestar di Pueblo di Kòrsou.

Un kos si e ke laga bon kla, i esei ta ku -sea pa bon òf pa malu- tur responsabel mester respondé i duna kuenta di rason di kualke situashon ku a surgi na Aqualectra. Un retiro no ta anulá ningun persona di su responsabilidatnan. Tumando na konsiderashon ku e rapòrt a keda repartí bou di prensa, e ke pidi enkaresidamente, pa duna Gobièrnu, e Instansia Forénsiko ku a traha e rapòrt i tur individuo enbolbí ku kualke responsabilidat den Aqualectra,  chèns pa studia i trata e rapòrt na un manera profeshonal.

E kompania Aqualectra ta krusial den nos bida i pa desaroyo di ekonomia di Kòrsou. Ora tin black-out nos tur ta sufri i pais ta pèrdè.  P’esei e ta supliká tur ku ta stima Adelanto Di Nos Pais Kòrsou, pa nos trata e rapòrt aki ku madures i na un manera profeshonal. P’esei por lo pronto komo representante di AVA pa ku Aquaelectra e lo no duna komentario riba e kontenido dje rapòrt forénsiko, te ora  haña oportunidat di formulá un punto di bista al respekto.

Akshon di lèk e rapòrt ku apénas a sali fresku den dianan di fin di siman di kambio di aña ta duna hopi di pensa! NOTA: Mester bisa cu Noticiacla mes ainda no a logra pone man riba e documento aki pa verifica un que otro riba e contenido. E texto ta scirbi den Papiamento fonetico di Corsou.