Cuidadonan di preso ta apela nan sentencia ricibi

ORANJESTAD -E mayoria di e cuidadonan di preso, kendenan a wordo condena na 24 luna di prizon y 5 aña sin por traha den KIA, a dicidi di apela e sentencia. Esey abogado di diferente di e cuidadonan di preso, Edwin Duineveld a confirma na e matutino Bon Dia Aruba awe.

E SENTENCIA

Tabata dos siman pasa cu huez a sentencia 6 bewaker di KIA na castigonan di prison, y a duna 2 vrijspraak. Manera ta conoci  e sentencia mester a cay riba e caso di acusacion di tortura contra un prisonero. A prueba cu 6 tabata culpabel y como tal e bewakernan M.W.l.G., D.N.J.L., I.H.G.M., C.R.J., G.O.M. y R.J.d.l.C. a wordo condena pa castigo di prison di 24 luna. Fuera di esey, nan no por fungi como bewaker pa e periodo di 5 aña. Ta bo pa sa cu pa L.G, a exigi un castigo di 36 luna, mientras cu pa e otronan, a pidi 30 luna.

VRIJSPRAAK

Pa loke ta e bewakernan A.R.D. y e muher M.A.C., huez a duna nan vrijspraak. E motibo ta cu nan a “solamente” tene e victima y huez ta haya cu esey no ta suficiente pa califica como tortura. Ministerio Publico no ta de acuerdo y lo apela e dos sentencianan aki. Otro cu e dosnan ey, Ministerio Publico ta hopi satisfecho cu e sentencianan. Mester bisa tambe cu ta pa prome biaha, cu na Aruba ta cay un veredicto pa tortura (foltering).

CASO MES

 E caso contra 8 cuidado di preso di KIA pa maltrato di preso, a tuma lugar dia 23 di april proximo. Ta trata di personanan cu ta wordo acusa di, como ambtenaar den funcion na KIA, a tortura un preso. E caso riba su mes ta uno unico, mirando cu no ta usual cu un grupo asina grandi di persona hunto ta wordo acusa pa un ‘delito’ asina.  

CARGONAN

E cargonan specifico den e caso aki ta cu nan ta wordo culpa di a tortura un persona y/of a intencionalmente permiti pa un of mas otro tortura e persona aki, dor di a intencionalmente causa dolor fisico y/of mental grave y/of sufrimento na e persona, cu tabata deteni y/of den poder di e sospechosonan. Esaki dor cu a (mientras e persona tabata ge boei cu su mannan tras di lomba) a scop y/of dal e cu mokete y/of a dal e varios biaha na su cabez y/of curpa, a consecuencia di cual e persona a sufri lesionnan grave (entre otro, cashi di wowo kibra y kaak kibra) y/of dolor y sufrimento fisico y mental grave, y despues a lage algun ora parcialmente sunu cera su so sin a percura pa e haya cuido medico, a consecuencia di cual e persona a haya dolor fisico y mental grave y/of a sufri gravemente, y/of cu a intencionalmente keda sin actua mientras cu otronan a comete e tortura aki riba describi, cu e fin di haya un confesion di e persona y/of straf e pa algo cu el a haci of a wordo sospecha di a haci y/of pa spanta otro hende. Cu excepcion di e persona M.A.C, tur ta hendenan masculino. E inicial di esnan sospecha pa e caso aki pues ta M.W.l.G. D.N.J.L.,I.H.G.M., C.R.J., G.P.M., A.R.D., M.A.C., R.J.d.l.C..