Mas cu 225 mascota a perde den 7 dia na Aruba debi na tiramento di klapchi

ORANJESTAD – Mas cu 225 mascota (mas parti cacho) a perde den un periodo di 7 dia desde 27 di december aña pasa na Aruba. Asina esnan cu ta opera e pagina di Facebook Lost & Found Pets Aruba a raporta diaranson. Segun e informacion, solamente mitar di e cantidad aki a keda haya bek y reuni cu nan famia. “Otronan lo no tin e luho aki y lo sea termina morto of perdi canando riba caminda na Aruba”. Tur esaki debi na e tiramento di klapchi cu a cuminsa for di 27 di December 2023. “Ta tempo pa bo tuma klapchi na serio y tene bo mascotanan sigur” e mensahe ta sigui bisa. 

GOBIERNO

Gobierno no a scapa di esaki, unda cu e mensahe tabata “Ta tempo pa gobierno enforsa e ley (di cacho) y multa hende cu ta tira klapchi despues di dia 1 di januari. Ki bal e ley si e no ta wordo enforsa?”. Ayera caba e portal aki, esta noticiacla a raporta riba e hecho cu hendenan ta tirando klapchi sin misericordia despues di dia 1 di januari, mientras cu ley ta bisa claramente cu por tira klapchi te 1 di januari pa 1 or di merdia.